腳印印度行

綿花趁住依家旅遊淡季去左個6天印度金三角之旅 : 德里 - 亞格拉 - 齋浦爾

個個都話印度 落後, 穢亂, 治安差, 要打防疫針先好去......

但原來都唔係好似想象中咁差0者, 本來我最驚係食唔慣當地野, 因我腸胃本身都幾差既, 但竟然都無事, 所以我可以以過來人身份話俾有興趣去印度而又膽心既朋友知, 只要你好似我咁參加旅行團就會比較安全架啦 ~~

去印度最主要係參觀文明古國既偉大建築, 例如 -  泰姬陵, 琥珀堡, 亞格拉堡, 勝利宮 等, 真係聞名不如見面, 氣勢之大令人拍案叫絕 !

而當地民生方面, 佢地住既食既環境都真係好差, 交通混亂, 一片爛地.....不過我地始終都係去大城市旅遊區, 我相信最惡劣既境況我地遊客係無法感受得到

係印度只不過係短短6天, 但交通上已經去了大部份時間, 要橫越三個省, 每個省都要6小時車程, 重有來回飛機又係6小時一程, 真係坐車坐機坐都怕, 不過好處就係行程變相得好輕鬆, , 一早坐長途車, 下午半日行程, 5 6 點左右就回酒店休息, 好夠訓又好精神喎 !

食方面, 九成餐都係係返自己間酒店食buffet, 雖然西式, 但都有好多地道各類咖哩美食, 但有d類別真係食唔到, 好怪味咁, 而且一日三餐都係差唔多, 真係一世人食咖哩既quoter, 係呢個trip到食滿哂啦~~~~

我覺得印度都有唔同既奇觀或旅客體驗, 例如 :

隨街可以見動物自由又安全地行街街, 牛馬豬狗猴...d車要讓路俾佢地先行, 人與動物和平共處, 好和諧, 尤其去到齋浦爾既市集停車場, 你會好似去左動物園咁, 動物們同你打成一片 

經常見到印度男士通街自由奔放地小解....

交通無皇管, 兩線會有三線行車, 三線變四線行車, 左cut右cut, 重好玩過"瑪里奧賽車"   不過好彩都唔會見到有"對頭車"既...

一般道路都係爛地一條, 可以形容為頹垣敗瓦之地, 從來無見過叫垃圾桶既物體, 條街都會好似係堆田區咁由垃圾堆成咁, 見親d"聖牛"都係地下搵野食 (呢個只係係車程中必然睇到, 我地係唔會落車行到呢d地方).

到旅遊區, 一落車會有迎賓隊伍列陣歡迎您 ! (即係小販或乞丐), 小販買既通常係小飾物或小玩兒, 當你傻瓜既會一開口叫價幾十蚊美金, 老實d既都會叫2蚊美金, 但通常要成交既最少俾1-2蚊美金都走唔甩架啦, 所以我覺得做旅遊區小販都幾富貴.

到你準備上車離開時, 又會有歡送隊伍列陣...唔係歡送您而係挽留您, 繼續盡最大努力賣野, 而呢個時間通常d野又真係會平返d既. 例如去到大景點會有好多攝影師一路跟你影你相, 佢地計時間計得好鬼準, 通常行到一半路程已經哂到相睇,  價錢係2蚊美金1張相, 係企硬價, 不過佢知道你就嚟走既時間, 佢地就會開行turbo死爛打求你買, 我就試過2蚊美金買哂4張相,  之前既團友因為心急就買左貴相, 亦有試過係第二日有人會拎住你未買返既相再求你再買返, 佢地好勁架知你行程又到認你個樣喎.

其實重有好多得意又新鮮見聞會體驗得到, 總括嚟講, 我覺得印度本身係一個好地方, 農產物資豐富, 印度人其實好可愛, 本質係好純品善良, 只是貧富太太太懸殊, 為左生活幾歲大人仔就要出嚟搵食, 放棄受教育既機會,  人民無文化無教育社會好難有進步, 國家亦難以富強  .... (講講0下講左呢d tim)

係泰姬無端端有班印度婦女走過來要同我影相, ( hahaha 原來綿花係印度當地都有fans) ;p
跟住我叫她們教我跳印度舞, 就成就了這輯最難忘的影像 ! - 有朋友問我佢地係咪收錢既演員, 唔係呀, 佢地係都係遊客, 可能對我好奇所以請我同佢地影相law, 佢地都好友善架 !

可愛的印度 -  獨特既氣息, 獨特既人情味, 獨特既異國風情...希望你地都去感受一下啦 ~

ps : 各位觀眾友好, 明天星期三晚10月28日10:00pm我會返互動電視做節目, 我會帶埋手信俾幸運兒, 留意啦 !