2006年9月16日 (上)：帶住無涼沖既臭皮囊由雲南過境西藏

幾經趕路，終於在9月15日晚抵達雲南最南之佛山鄉。佛山鄉其實係中國版既美國西部牛仔地帶，用兩個字形容之：蠻荒。為免司機長途駕車導致疲勞過度，眾人是晚在當地下塌。唔好諗住係乜野酒店，實情係類似招待所既物體。分配好5人一房後，大家開始張羅洗手間及浴室。問了該店負責人，廁所響邊度？對方猛指：個邊，個邊。望下個邊係咩黎先！啊，原來係對街既一條露天坑渠，你明架啦！觀乎眾女似乎唔多受落，我則無有怕，忍尿對身體唔好架，難得可以當街進行大解放，仲可以一邊腳印印，響香港幾時可以表現得咁豪邁？哈哈！

「洗手間」尚且如此，也不要對「浴室」有期望。浴室是有的，但因為佛山鄉採用太陽能，唔夠陽光嘛，即係無熱水。佛山鄉說冷不冷，但晚上一直下著傾盆大雨，加上怪風頻襲，一吹埋黎，活脫脫像龍捲風一樣，再夾雜粒粒粗沙，箇中滋味真係唔試過唔識形容。

到內地旅遊，尤其落後地區，記住帶備一身「紙」。除左銀紙，仲要有：抹身紙、抹面紙、紙巾及濕紙巾。水源嘛，你見倒有水喉唔代表佢有水出既！整晚拎哂一身紙出黎左抹右抹後，你會發現原來無熱水沖涼，甚或一晚唔沖涼根本nothing at all。

9月16日的清晨帶著絲絲涼意。起床後，學著當地人姿態，一個紥馬，蹲在地上刷牙洗臉。這也是很好的體驗呀，換轉閣下參加旅行社的高級豪華團，可有機會感受如斯鄉土人情習性？

食過早餐，係時候驅車駛進西藏。佛山鄉人鮮有接待咁大棚人食飯，食具一時張羅不了，所以當店主把麵點端上桌時，大家也不禁為之失笑。

個盆可能洗完面同腳後再用黎載麵...講到呢度，大家都忍唔住閉嘴偷笑 @.@"

話咁快車隊已駛入西藏界。路邊一塊牌，確認了左邊係雲南，右邊係西藏。雲南的景色甚美，如將來有時間，一定要重遊細看。不過今次旅程既主打係西藏，當然要預留大部份時間在當地啦！

西藏既第一站為鹽井。數百年來，納西族人在瀾滄江邊用石堆砌豎井，又在江邊兩岸築起曬台，以便從豎井將鹽水運上曬台。鹽水經曬乾後會結成一層層潔白的鹽。惜天公不造美，之前連場大兩過後，潔白的鹽是看不見了，一個個被雨水沖至啡色的曬台倒似在曬蝦膏似的。