處女下海挑戰樂施毅行者2006

相信各位一定好奇怪，參加樂施毅行者2006同Miffy BB公仔有咩關係呢？

驀然回首，追源溯始，其實故事係咁既...

話說舊年莊周兄中簽參加樂施毅行者，二話不說即刻開操。莊周兄成績向來不俗，又有做開運動，個人睇好佢30個鐘應該無問題。誰知有次相約莊周兄行山，大家響茶餐廳食早餐時，對方失驚無神響銀包拎張紙仔出黎，大家一睇：嘩！原來係毅行時間表，對方仲立志要創下22小時完成佳績！老實講，我對莊周兄信心不大，話哂佢之前無長途賽經驗，一次過行哂10段麥徑並唔係將分段成績加埋咁簡單既一回事呀！

無奈事主實牙實齒誓要一矢中的，我地作為義氣仔女既一份子梗要吶喊助威啦！遂二話不說挺身而出做獅子亭「實扑」。我地夜晚12點前已上去士多門口等、誰知一等、再等、等了又等…就是2個多小時。莊周兄姍姍來遲，一算之下，22小時確已達標，不過只成功完成路程既一半！見莊周兄一臉殘樣都唔好意思奚落，只好叫佢食飽D先再上路。比賽當日天氣超級霹靂熱，上西灣山時估計最少35度，正常人都熱到傻啦！酷熱天氣影響下，莊周嘔吐大作引致體力急降，到獅子亭時只剩半條人命。經過麥徑3 + 4段既折騰下，佢已無哂胃口，食兩啖飯就放低飯盒，此情此景，確實我見猶憐。幾經擾攘後，莊周兄決定再次站起來－－剪手帶！我地當場一呆，力勸佢諗清諗楚至好行事。只要一剪帶，辛苦經營既50km豈非化為烏有？可惜莊周已視死如歸，無懼今次既失敗毅行經歷而比我唱衰一年，仍然豁達地揮慧劍斬手帶，可憐佢3位精神奕奕既隊友只能默默上路完成賽事…

November 10, 2006 @2 pm：西貢北潭涌起步點，人聲好鼎沸呀！

好喇，風水輪流轉。今年到我處女下海挑戰樂施毅行者，論大賽經驗，我比莊周略勝一個馬鼻。去年我參加左雷利衛徑長征，賽程78km，以27.5小時完成，雖達唔到心目中target，但成績未算超級丟人現眼。目下既我狀態完全唔掂：身型肥腫難分、磅數爆quota、操練少、又唔跑步練氣、經歷西藏之旅後更見心散…雖然比賽前有打泰拳練氣，但練習次數稀疏。咁既死款，即刻引黎成堆人睇小 + 睇死我，爭在未開盤口買我邊個CP放棄，鬧得落荒而逃。

隻Miffy BB公仔嘛，就係莊周兄開出既盤口。只要我完成樂施毅行者，佢就立刻乖乖奉上。倘若我touch wood中途執包袱就自己真金白銀比返佢。盤口一開，我抱住「不成功，便成仁」心態起步，雖在麥徑3段拗左2次小柴，落山時由兔速改為龜速，但當腦中浮現可愛既Miffy BB公仔及莊周充滿狡黠既笑容時，內心登時激起鬥志：唔得，唔可以響呢度走架，好歹都要以少過22小時到獅子亭，或在後一個CP先剪帶走！此信念一直默默守護我，終於使我平安抵達終點。莊周更對我投以百份百信任票，提早響CP8時已親自送上Miffy BB公仔一隻，使我好生感動～

今年乃樂施毅行者的25週年紀念，每位成功完成的參賽者皆獲發銅章一枚

至於來年嘛，我定必會以更佳成績，洗掉今年之恥！