2006年9月22日(下)：參觀大昭寺，遊走八廓街

離開布達拉宮並吃過中飯後，一行人即前往大昭寺參觀。我對寺廟興趣極有限，但該建築躋身世界文化遺產，加上門票要成70蚊張，相信點都有D睇頭。事實上，大昭寺的景觀更勝布達宮，論氣勢當然輸足成條街，但景觀卻更感開揚。可能宮內比較多地方自由進出，加上屋頂可俯瞰大昭廣場，右方又與布達拉宮遙遙相望，站在該處頓感豁然開朗，與布達拉宮既迫狹感自不可同日而語。

大昭寺外牆較鮮艷，寺內亦十分雅緻

就算你唔識影相，只要向蔚藍天空 + 大經幢輕按快門，已可構成佳作

參觀完大昭寺後，眾人馬上分道揚鑣。有文化人選擇到西藏美術館睇唐卡，我呢D咁無文化既梗係去八廓街狂掃啦！不向對富民族特色既飾物及家品愛不釋手，今次到來少不免抱「入貨」心態。無奈行唔夠一陣，眼前已金星亂舞…所有攤檔都賣差唔多一式一樣既貨品，唔暈有鬼。首天收獲不多，但在街上卻發現好多千奇百怪既店舖。除此之外，亦發現原來「周街喇嘛」亦不存在於該區，更多既，乃來自歐美及香港既遊客，仲要成條街都係！在八廓街一帶巧遇2位喇嘛，但你睇下佢地響度做乜？

可能太一廂情願以為喇嘛好神聖，當看見此情此景時，只覺格格不入

在八廓街頭不難發現，兩旁街道大多擺賣千篇一律既藏風飾品，較精緻又較罕見既貨色大都隱藏於店舖內。當然，兩者貨品價格不可同日而語啦！有趣街景甚多，其中包括：

名店區－大家耳熟能詳既Kappa，Nike，柒牌 (唔好笑，大陸名牌黎架)，Bossini同我既至愛Adidas都可以響呢度搵倒。Adidas門牌驟眼望去好似冒牌店咁 (事關佢個門牌字體大小不一)，不過入去檢查一輪，肯定佢係正貨黎，仲發覺價錢比香港貴一截，見狀速逃～

國內Bossini及Adidas貴得令人咋舌

柒牌只供應男裝
 

背囊友區－老外同旅館數目十分成正比，無他，外國遊客確比我地熱愛expedition，住hostel或guesthouse唔單止可以識更多志同道合既朋友，搵「腳」一齊外遊都易好多。我地經過一間hostel時就忍不住入內視察環境，而第一個映入我眼簾既就一大班人響微風吹拂及和煦陽光下踢毽，真係寫意～ 

背囊友搵「伴遊」往往是這樣開始的：萍水相逢 + 一齊踢毽 + 一張字條 = 徵友成功

逛完八廓街及享受完一頓豐富既晚餐後，眾人再到百益超市掃貨。百益響拉薩設有分店，相信其規模可與我地既X佳或惠X匹敵。由於臨近中秋，超市四圍都放左唔少月餅，好奇下張望呢盒至豪華至得體既月餅，外設一個大木盒，裏面再以獨立鐵盒盛載月餅，成「七星伴月」狀，如斯包裝，大家不妨估下賣幾錢？

盛惠1260蚊人民幣，好貴！
 

八廓街及百益超市既斬鑊：T恤 + 經綸  + post card + 手袋 + 飾物 + 大白兔