快樂快艇II - 下水禮

病了好幾天, 今天總算有精神定定的, 靜靜的坐下來, 返到我的712 Blog, 看看大家的留言, 以及寫返一些要記下的美好時光.

快樂快艇II上星期六舉行左下水禮啦! 我咁八掛, 當然有參與呢個歷史性時刻啦!

經過船長精挑細選嘅, 究竟快樂快艇II係點嘅呢?

是這一隻嗎?

還是這一艘?

定係呢隻傳統型呢? (都唔錯丫, 可以坐好多人, 多人一齊出海玩好熱鬧丫!)

哈哈, 全部都唔係! 到達香港仔後, 友哥帶我地坐街渡去一個船倉攞船...

船長要爬上去, 先見到佢嘅新船...你睇佢笑到見牙唔見眼, 心情幾興奮!

望著船從船倉調落海, 感覺超爽...

成功! 隻船係米好靚仔呢! 船艙大, 新淨, 穩定...仲有廁所方便換衫, 船尾樓梯方便上落, 仲有...

駛返碼頭前大家檢查下先

再影相合照...

哈, 新舊船主影張相...

途中經過一隻賣野食嘅艇...友哥話佢已經經營多年, 非常有特色, 找它醫肚快捷方便, 船家唔駛o下o下跑上岸買野食...

返到碼頭, 一班老友一早就在等候, Say Hi...

除左船長之外, 其實大家都好興奮, 有新船出海玩播, 梗開心啦!

影相大合照先. 今次團友有: 教地理嘅陳Sir, PoPo, 阿澤, Helen, 船長, Alvin, 阿紀同埋我... 

臨別秋波, 船長同友哥握個手先, 慶祝順利交接, 好溫馨丫!

甫開船, Alvin擺出"看似"大隻佬的姿勢, 哈哈哈, 笑死, 配上藍天白雲, 都係一幅很漂亮的畫面, 梗要影低佢, 然後公諸同好啦!

駛出香港仔就是深水灣, 經過沿南塱山而設的海洋公園...

多數從吊車望落海, 很少機會從海上望返上去呢...

船上一定要有救生設備, 但隃阿澤似乎攞錯左播...哈哈哈, 小童size, 哈哈哈, 點啱著呢!

離開海洋公園lu, 很喜歡這張天上的雲...

遙望淺水灣...

呢隻快樂快艇仲有嘅好處係, 船頭和船尾都有充足嘅空間讓大家聚在一起傾偈, 好開心...

我都要入下鏡先, 同陳Sir影返張合照...

因為上左人像班, 所以呢次都同大家影左啲大頭相...

(好曬嗎?)

很喜歡這個色澤漸變的藍天...

向大海出發後第一個經過的是鶴咀...幾多Satellite Dish...

跟住經過的是橫欄島...平時聽收音機廣播就成日聽到呢個地方, 親身到都係第一次...

跟住到達的是蒲台島...原本想食海鮮, 但要趕路返回大埔, 下次先...

再經過吊鐘洲...

好大浪丫...

再去糧船灣...呢度停留左一陣, 因為船長聽媽媽話, 新船落水去拜下天后娘娘, 保祐每次旅途都安全順利...

廟內向外影, 哈, 都幾靚丫...

拜完神, 哈哈, 我地開餐喇...义燒, 燒肉, 好味道...

仲有士多啤利味sparkling juice, 新船落水, 大家飲杯, Yeah!!! (我都入鏡嫁, 在倒後鏡內...哈哈哈!)

好味道...

呢三個傻佬, 果汁洗頭...阿澤遭殃喇! 哈哈哈!

無相干, 我地下一站就係去浮潛...地點係甕缸灣...

落水喇, 探頭入水中見到平時常見的海蔘, 海膽, 海星, 蟹蟹之外, 仲有不同種類的珊瑚, 好長似白鱔的劍魚... 

這裏的海床, 沙非常幼細, 踩落去軟綿綿, 好舒服呢...

經大家鼓勵下, 我就在這裏...hehe...學識左游水, 多謝Alvin, Polo丫, 教左我踩水, 阿紀就教我挺起個肚腩扮死屍浮水, 只要呼吸到就得喇...Alvin佢地仲教埋我跳水添...哈哈哈, 未學行先學走, 唔驚, 有海上巡邏隊阿澤在近距離接應, 我先至咁大膽跳落水, 我都唔敢相信, 我真係識游水嫁拿, 呢個問題, 我整日都問左PoPo幾次, 佢話, 係丫, 你識嫁啦...咁又係, 我真係大膽左, 唔會好似以前咁隻腳掂唔到地就驚...有進步...

天快黑喇, 因為要將船泊返大埔, 我地仲有好長嘅路要走, 所以不得不離開...因為濕晒, 無拎寶寶出黎影日落, 有啲後悔添...

沿路再經過東壩, 破邊洲, 大浪西灣, 咸田灣, 長咀, 短咀, 蚺蛇灣, 高流灣, 塔門, 好快就返到鹽田仔, 杜生的漁排...

食過飯, 九點幾就走, 好好休息, 佢地第二朝仲出海丫...我呢, 就要去操山, 準備毅行者喇.

收獲豐富嘅一個旅程...