墟市

尋日到朋友響屋企附近o既足球場, 開檔賣雜貨, 舊貨.

兩星期前, 朋友打電話問我有冇興趣攞自己o既野出黎賣, 因為佢響自己住o個區申請左一個攤位, 主要賣走屋企o既剩餘物資, 例如朋友送o既童裝, 禮物等.  又打電話問朋友有冇多餘o既物資唔要, 送畀佢去賣畀更適合o既人.  售價當然係好吸引.

我自己最後決定將房裡面舊o既休閒讀物, 或漫畫單行本攞去賣.  喱十幾本書都幾重, 有o的近一兩年買o既, 又有o的已經買左十年. 重有其他書同漫畫, 不過畫花左或唔捨得賣, 仍然收藏.  而且, 帶十幾本書出去賣, 睇下o個個賣場有冇銷路, 再考慮下次帶多o的出去.

朋友九點幾已經開始賣, 我出街食過早餐之後, 再搭巴士到達賣場. 

明愛協助舉辦喱個墟市, 主要目的畀附近街坊賣乾貨, 例如, 藝術品, 精品, 舊衣, 毛公仔等. 時間係九點半至下午四點半.

同朋友打個招呼後, 我將帶黎o既書放上枱面, 貼上左價錢, 大部份都係半價出售.  朋友有童裝, 手袋, 玩具, 水杯, 舊書, 手提袋等.  仲有焗爐, 榨汁機, 醬油瓶.  上午已經賣左好多貨, 下午比較靜, 只係有幾單生意.

每個攤檔都有一張枱, 兩張靠背摺椅, 有帳蓬遮住, 左右檔被落地布遮掩, 每個檔位大約兩米乘兩米, 所以環境非常舒服, 加上天氣非常適合戶外活動, 我地o既位置唔會長時間被太陽照射, 所以全日都好輕鬆.  現場偶然會舉行專題講座, 唱歌表演等.

黎參觀o既遊客, 大部份已婚婦, 帶住細路, 或老人家.  二十歲左右o既人非常少.  而且, 我覺得活動有關機構宣傳太少, 即使星期日都唔係好多遊客.

朋友最希望一日內賣晒所有貨, 最後, 大件o既貨都賣左一半, 到收檔時, 就唔洗搬得太辛苦, 又可以將物資賣畀其他人, 都算係環保啊.  我自己帶黎o既書, 有三本賣左畀一個好鍾意睇哲學書o既女士, 我知係因為佢走埋黎時, 手上已經賣左十幾本關於哲理o既書.  我讓小小枱面畀佢暫時放低手上o既書, 然後輕鬆o的去揭我o的書.  幾分鐘後買完, 我攞左個機構派畀檔主o既大環保袋畀佢, 順便載住佢之前買o既書, 佢好開心咁離開.

我都好開心有至少一個人買我睇過o既書.  因為o個三本書已經有十年或以上. 而其他漫畫書只有幾個小學生揭兩下就放低.

我同朋友一邊睇檔, 一邊閒談, 好似一個聚會, 好開心. 買或唔買o既客人走左之後, 我地又會講下大家o既感受, 好似更明白做生意o既心得.  當話題停住, 就坐響度睇下其他攤檔o既銷售情況, 路過o既遊客.  因為賣場旁邊係一個兒童遊樂場, 所以經常會見到好多父母帶住或用手推車載住小朋友, 好多都樣子可愛.

差唔多四點半, 我地就開始執拾準備離開, 朋友下次會再黎擺檔.

喱個墟市下一次舉行日期係十二月十三日星期日, 地點係西區科士街球場.  我視乎情況再決定去唔去.