自己扶起身

Felix呢兩日已經自己可以係張床度扶住床邊企起身, 完全唔需要別人幫手 ..... 勁呀! 不過正因為咁佢不停咁起身, 坐低, 又起身, 又坐低, 冇時停, 攪到成日滿頭大汗. 佢不時都好好精力, 相反我就冇佢咁好體力. 攪到我勁攰, 又周身酸痛.

佢依家自己扶起身, 我都要叫Felix爸爸把張床調低一格先得喇! 唔係佢好容易爬出黎, 跌親就大件事喇!

上星期日, 我同Felix去婆婆屋企, 平時Felix要睇心情先可以俾其他人抱. 佢個日心情非常好, 公公自己抱咗佢出去行個圈, 都完全冇意見. 又同佢一起瞓覺, 見唔到我都得喎. 我諗都要去多啲Felix婆婆度先得喇! 佢依家識認人, 好快又唔記得公公婆婆喇!

近排好煩惱Felix嘅生日會, 都唔知係屋企攪, 定出去攪好. 淨係Felix婆婆同嫲嫲一家已經10個人, 如果再加埋契爸爸, 契媽媽同啲朋友仔, 成20幾人. 啲人話唔好攪得太大, 怕小朋友受唔起喎. 距離Felix一歲生日仲有三個月, 好快就大個仔咁. 唔知佢幾時識講野呢.