生日快樂

尋日係家長日，由早上八點見到下午三點幾，好攰呀！不過由於終於等到放假嘞，所以心理上覺得冇甘攰。

晚上約左joyce係新世紀食飯同睇戲。去左大家樂食，我叫左一個餐，佢叫左火鍋，當然joyce比左好多火鍋我食la，所以食得好飽，幸好沒有胃痛。

我地睇嘅係由古天樂同劉若英主演嘅「生日快樂」。事前有人提我小心訓著，因為套戲嘅節奏幾慢。不過我就冇呢種感覺，我覺得都ok呀。

故事係講女主角因為一d童年陰影，所以好怕自己所愛嘅人離開自己。結果佢寧願選擇同佢最愛ge男人做好朋友。二人曖昧嘅關係拖拖拉拉多年，最後男主角選擇同另一人結婚…。

我估大部分人最深刻係男主角嘅長情，同埋女主角情緒化嘅行為。而我最深的體會係一個人童年陰影對佢長大後嘅影響係可以好大。