Happy Birthday

每逢年尾收到新年曆時,首先我會睇下自己下一年嘅生日係星期幾. 

細個嘅時候覺得生日係大日子, 以前生日亦總係一大班朋友一齊慶祝, 收到好多禮物. 後來你有你嘅生活, 我有我嘅忙碌, 朋友或係自己嘅生日亦由出嚟食餐飯, 演變成為通電話, 再成為Email、Oh...sorry.......Happy Belated Birthday, 甚至乎已經唔記得咗, 唔好怪人, 自己都會, 呢啲係絕對反映佢喺對方心目中嘅重要性. 

人大過咗唔再好似以前咁慶祝生日, 一切低調處理, 最多都係同屋企人食餐勁嘅就算. 但若果有人仲記得而同我講聲 “生日快樂” 我都會好開心架.

今年收到嘅電話同Email, SMS有來自九龍西, 新界西同新界東嘅大學同學, 香港選區嘅中學同學, 更有遠至美國, 加拿大同巴林嘅代表, 認真唔話得. 

另外唔知係唔係同上星期做咗個手術有關, 我竟然收到好多Surprise, 真係大難不死, 必有後福, 唔信? 去片一齊睇睇

好朋友送嘅盛放玫瑰, 連公司個Receptionist都話: 咿..妳有花收喎 (咁睇死我)

同事送嘅蛋糕, 佢哋好快手點著支爉燭後叫我許願, 太突然啦, 我一時間都唔知許咩願好, 又唔好意思要人等, 求其啦. 唔知其他人係唔係都會好似我咁呢? 而我印象裡面上一次收到蛋糕好似係20歲嗰年雙兄送嘅.

李俊男嘅朱古力味雪糕 (食咗先記得影相)

歌頓嘅2GB USB手指甲

劉老師嘅負離子手鈪

獎勵自己嘅九記牛腩麵, 但貴咗又細碗咗

我送畀自己嘅頭箍

上禮嘅德國薑餅 + 限量版 Big Kiss

姊妹們嘅so far so gooooood

老爸嘅珍藏黃酒

當然唔少得呢啲啦, 但我收利是之餘都會另外再畀錢兩老飲茶架, 因為佢哋我先至有生日加嘛

自從20歲嗰年有個朋友請過食大閘蟹之後, 以後嘅生日我唔再食紅雞蛋, 改食大閘蟹喇, 今年寧波老闆娘話月尾先當灶, 咁你哋等我吹雞囉噃

再次衷心咁多謝每一位對我嘅祝福