陪太子遊山玩水

~25th October, 2009~ (Sunday)

測驗之前, 阿仔有個同學想邀請佢今日可以一齊去海洋公園, 陪呢位同學仔過生日.......

當時, 我冇一口答應, 只係同阿仔講要測好個驗先, 如果測得唔好, 我唔會同佢去架!

其實, 我個心又點會唔帶佢去丫, 只係唔想佢地成日掛住吃喝玩樂, 又覺得所有嘢都應份要俾佢地, 所以我點都唔可以俾阿仔覺得咁容易得到.......

結果, 阿仔都做好佢嘅本份, 而我當然知道佢真係好想出席同學嘅生日聚會, 所以點都會做一個廿四孝嘅媽媽, 之前仲同佢一齊去揀禮物送俾呢位同學仔添......

雖然, 我同家長們唔相熟, 之前都係見過一次咁多, 但因為小朋友之間friend, 為咗小朋友, 我點都會出席架!

見到阿仔同d同學仔玩得咁開心, 我都好開心.....今日佢唔多理我架喇, 最緊要係同朋友玩就得, 而我又要同d家長聯誼吓喇!

唉....而家做阿媽真係唔容易架!

我最鍾意就係見到阿仔同小朋友可以一齊玩得咁開心, 小朋友有自己嘅世界, 有自己嘅喜好, 我覺得出去玩係可以俾佢地自己做話事人, 既然帶得佢地出去一齊, 就會俾好多自由度佢地架啦!

點解我會咁講?

經過大半日相處後, 我發覺壽星仔嘅媽咪絕對唔明佢個仔嘅想法, 大人習慣要話事, 食咩玩咩全部都reject晒小朋友, 我見到佢地會好失望......就算我地大人發表意見, 呢位媽咪都係咁, 最後我地都係會照佢意思, 根本佢係習慣咗, 冇得改架喇!

當小朋友想玩機動遊戲時, 呢位媽咪又話朝早成家人都冇食早餐, 佢地好肚餓, 所以又叫唔好玩住, 去食嘢先啦.....

好喇, 到小朋友想食呢樣, 佢又話食嗰樣.......

到食完嘢, 小朋友梗係想玩啦, 又話啱啱食完嘢唔好玩住, 去睇海獅表演啦......其實, 我個仔同我講, 佢地唔想睇架!

有人提出玩滑浪飛船, 佢又話冇帶雨褸....吓? 唔係掛? 我地從來都冇用雨褸玩喎, 相信就算有都一樣會濕架啦.....激死!

好多好多例子.......我諗佢真係唔識學習聽吓小朋友嘅聲音, 有時可以嘅情況吓, 係可以俾佢地做決定嘛.......

尤其今日仲要係佢個仔生日, 唔通咁小嘅要求都唔ok?

近日, 海洋公園夜晚有哈囉喂活動, 所以到處都見到好多有關嘅佈置, 好靚又好得意呀!

我都係第一次呢段期間去, 所以都覺得好新鮮, 見到有咁多得意嘢都要係咁影相.......

而家睇返d相見到佢地咁開心, 我都會好開心, 希望可以俾阿仔有個好好嘅回憶, 童年過去咗就冇架喇, 我只係想阿仔可以開心同健康就夠喇!

到咗6點幾, d鬼開始出沒, 我覺得好興奮, 好鬼鍾意佢地嘅扮相........

不過, 小朋友就相反喇, 佢地個個都好驚, 見到佢地真係好緊張, 以為自己真係見到有鬼呀.......

其實, d工作人員嘅化妝真係幾嚇人, 有時我近望都會驚驚地架, 想望耐d都唔敢呢....哈哈!

最後, 我地成8點幾先開始走, 後來同阿仔出返金鐘就自己去食嘢, 其他同學仔嘅family仲話唔知去邊樹食嘢, 我唔去lu, 如果去埋, 11點都返唔到屋企呀!

唉, 今日絕對係勁疲倦嘅一日, 我地對腳真係攰到不得了.......

P.S. 夜晚, 我同阿仔討論返今日嘅事, 原來小朋友都感受到人地嘅專橫, 咁我就同阿仔講........其實你應該慶幸自己嘅媽咪唔係好似同學仔個媽咪咁呀, 哈哈......我知阿仔係知道架!