與眾同樂

26th October, 2009 (Monday) 重陽節

呢幾日公眾假期都有活動, 之前緊張完一輪之後, 而家終於可以完全放鬆心情, 想做咩都可以喇!

哈哈.....之前得到一筆橫財, 魔女個心一早已經決定會請屋企人食飯, 不過都係要我辦妥晒所有嘢, 先可以安排食呢餐飯哩!

阿哥話不如去呢度食, 無所謂丫.....於是我用極速嘅效率去book位, 趁大家都就到時間就快d去食啦........

被我邀請嘅名單有以下圖片嘅家庭成員, 原本仲有細姨架, 可惜佢病咗, 要留係屋企休息, 今晚真係嚟唔到.....但係我會再搵另一日同佢去食嘢架, 親愛嘅細姨!

每個人都有唔同嘅口味, 而我同老公之前都有其他想法, 但我又驚自己所揀嘅地方未必啱佢地, 所以都係去呢度食啦!

不過, 今次去真係令我好失望, 因為咁啱原本食自助餐嘅地方裝修, 臨時搬咗去另一個地方細一大截嘅偏廳, 地方細咗, 食物種類亦少咗, 而空間亦細咗好多.......

唉......如果我早d有留意到, 就會再搵其他更好嘅地方食嘢.......

呢間酒店出名係食甜品, 好多人都知甜品總廚係邊位, 仲有出書架, 佢所做嘅甜品係一流, 亦因為佢做得太出色, 我真係未有咁嘅功力, 冇本事學, 所以冇買過佢嘅甜品書, 只係睇吓咋........哈哈!

適逢食大閘蟹嘅季節, 所以每人都會奉送一隻, 真係多到食唔晒, 要攞返屋企添.......

睇吓我個肥媽幾食得......哈哈!

見到佢咁有胃口, 我都唔會太阻止佢, 只係叫佢唔好食咁多甜品啦!

而家為咗健康着想都唔會食得咁狠死, 雖然個肚仲有quota, 但係我都唔會再食到十成飽, 費事啦!

今日只能見到阿嫂一陣咋, 咪又係因為冇時間觀念同鍾意即興嘅阿哥囉........唉! (唔好俾佢睇到呀, 費事佢嬲我啦...嘻嘻!)

哈哈.......上次我咪買咗一隻吉蒂頭形碗嘅?  以為都係得一隻架啦!

點知......原來靚靚阿嫂同我同一日去咗同一個中心, 但唔同舖頭, 買咗同一款碗俾我呀.......今晚終於送咗俾我喇, 又可以成雙成對, 一對原來又真係靚好多喎.......

又要講一次啦: 多謝靚靚阿嫂!