台南–因為有你......所以好美！Part 1

2006年3月20日

係呀！要由台北飛台南做嘢呀！之前，我同事叫我一齊坐車去，點知原來全世界都坐飛機！個同事仲俾人篤爆係有「飛機恐懼症」。結果我係起飛前一晚，漏夜由酒店的商務中心訂飛。以下係商務中心某男職員同我係電話嘅對話：

我：「麻煩你幫我訂明早去台南的機票。」

某男職員發晦氣，但仍語帶嬌嗲：「小姐！這裏是商務中心咧！」

我居然好平靜o甘回答：「是呀！所以你要幫我訂機票啦！」

某男職員拎住個電話，語帶不屑，轉身向佢嘅同事話"她說要訂機票咧！" 然後就由佢位同事代佢處理我。

所以話：今時今日o甘嘅服務態度.............真係激死人！

第2日，我一早就去松山機場搭內陸機去我從未去過的台南啦！

一check-in冇耐就登機，一登機冇耐就有一把「林志玲」聲嘅空姐做廣播，再冇耐，有幾個着住紅底白波點，有啲似minnie mouse造型嘅俏空姐派茶。嘩！有個米妮空姐仲激搽閃綠eye shadow....勁！

Oh...張櫈未坐暖就到埗囉。部機未停定，啲人就企晒起身打開頭頂個櫃；嘩！我袋文件裡面嗰兩隻由細V送俾我嘅蓮霧飛彈咗出唻！啋！好彩執得返。

我一到埗，就走去個遊客counter拎地圖，個工作人員好好人呀！仲教我去邊度搭事、車費係幾多添！

係坐車途中，我見到好多檳榔西施，當中大部份都係歐巴桑......點解同係電視睇嗰啲唔同嘅？

終於去到工作地點啦！

其實工作方面，有乜好講呀！重點係我係台南又見到佢啦！佢又有份行show...kawaii......其他的人面目模糊，但佢就...哈！哈！哈！哈！

Okay！工作過後，梗係要玩啦！個男model？話之佢啦！(待續)