父母愛兒

原來呢個世界上，父母可以愛自己的子女去到一個不可理喻的地步。

姪女派到一間幾理想的小學，她的朋友媽咪竟然可以和佢媽媽講，間學校唔適合佢讀。邊方面呢？大家都估緊…

大人聽到當然不開心，問我呢，我知道這些都是眼紅吧！因為該家長的女兒被派到另一間相對較無名氣的呢！將不滿情緒咁直接表達的，平生真係第一次聽。

小學階段固然重要，在學習上和人格上都是建立基礎的重要時刻。這方面母校的確帶給我不少的啟蒙，到了今天也心存感恩吧！但話說回來，小朋友學好學差，學校以外家庭的培養也很緊要。如果在小一咁細的時候就開始在她面前做出這些低劣的行為，我不敢相信以後對她的成長會有什麼的影響。

母親大人由於工作關係，真的甚少和其他家長有聯絡。小一時一次的經驗後，更令她對與其他家長social全無興趣。事關有日一個家長突然在放學後，和我媽講我個頭生X, 仲振振有詞，當然都好關心咁。而我阿媽就竟然信左佢，帶左我去剪哂把又長又靚的頭髮，變左男仔頭！之後某年某日，大家都見到佢帶住個把頭髮已經好長的女來打招呼，心知不妙…

其實當年令阿媽驚的，只係頭屑而已。我無為這事怪她，而且她工作實在太繁忙了，人心的確險惡，竟連這小處也不放過！

自此之後，除了家長日，佢都甚不願意出現在學校了。

人雖是群體的動物，但有些人真係唔識也罷。