08年10月11月12月

心血來潮想寫blog，睇番原來已有4個幾月冇寫了，今次就寫番去年底果3個月的一啲事先。

多得blog友瑪姬里妮提醒，原來我10月同樹頭婆去咗聽misia演唱會，由於當時有任務在身，所以未能好好咁享受，不過misia唱live真係好犀利，加上多首慢歌好似〈夜不成眠都為你〉、〈そばにいて〉等都好好聽，當然唔少得〈Everything〉啦，我同樹頭婆真係聽出耳油。

11月中，我同樹頭婆去咗沙巴「燒錢」，全程去得最多的地方就係市中心，其餘大部分時間留在酒店周圍hea，所有戶外活動好似上神山、去島仔同玩激流都一概欠奉。

搭早上8時港龍機直航出發去亞庇。

出發前查過11月係雨季，天氣唔多穩定，好彩大部分時間都ok好天，呢日仲非常天晴，爽爆。行程中，有2日在酒店泳池游水，返到來個人黑咗(其實係紅咗)同勁甩皮。

酒店泳池旁有一個所謂的私人沙灘，但好細個同埋啲水唔太清，而且唔記得乜事，佢有個牌勸人唔好落水，真奇怪，唔通個沙灘只係用來齋睇???

有一晚去咗市中心的大牌檔食海鮮，左下角的奶油老虎蝦真的不錯，而右下角的象拔蚌就幾清甜，左上角的蠔餅也不錯。

基本上去得沙巴的人，都會去呢間食海南雞飯，yahoo blog內大家的評語都係好壞參半，而我就覺得真係無乜特別。

我覺得最好食的就係左手邊的cheese cake，好滑，唔太甜，真係食過最好食的cheese cake。

10月同11月都有啲比較特別的事發生，但12月好似冇乜咁喎，唯一有印象的就係買咗mr children的新碟〈supermarket fantasy〉，全碟14首歌，有6首都相當不俗，抵買，結果我怒煲咗成個月……哈哈。