食藥的第二天

尋晚一路持續見Happy屙血尿,個心好慌,因為佢一次比一次屙得密同多血.於是o係11點幾打過去問醫生....雖然問唔返elaine,不過有個醫生問下都好丫....

由於佢要食配方糧,而我地又唔係好敢比零食佢食,再加上佢d藥要飽肚食,所以唯有等佢夜晚食飯一次食埋,而我都特登提早佢食飯時間,希望佢快d食藥快d好返...雖然係咁,但都等到夜晚7點先比佢食....點知....我世估唔到我隻垃圾happy竟然唔食配方糧,佢平時咩都食家嘛,點解會唔食咁香既罐頭??真係唔明??但由於我一口氣買左7罐(預1罐食到兩日),點知完全預算錯誤...原來半罐都好多家,再加上佢唔肯食,我地又揾雞撈比佢食(無辦法醫生話罐配方糧係可以溶解晶體嘛,而詢問過醫生之後都話可以撈雞),撈埋雞,佢先勉勉強強咁食咋,但睇個份糧,已經係平時既糧既3倍......可能由於攪食飯都攪左好耐先食藥,所以都成差唔多8點先食第一次藥....

醫生o係零晨12點幾1點覆我,佢話要留意多一兩日,如果個情況真係愈來愈嚴重就要即刻帶佢返黎睇.....

今朝起身第一時間就係去睇happy個廁所,睇下佢有無開小,終於比我發現一篤非常靚仔既尿尿.....個心即刻放鬆d,以之前既經驗,真係唔可以咁易就放心晒....但又發現佢個水樽好似無咩飲水...醫生話要飲多d水先得....無計可施下試下落小小葡萄糖水.放工後call阿媽睇下happy個情況,點知阿媽話佢成朝都無去廁所,而且唔係好肯飲水.....呢個女真係多事幹丫....一路叫阿媽留意住,一屙就call我...但一直到我返到屋企都無打黎(已經成下午5點幾家喇)~~返到去,如常地一見到男朋友就失禁,今日除左呢一次因失禁而流出既小小尿之後,就無開過小喇.....唯有拎支針筒灌佢飲水,之後就比塊餅比佢食,可能食完口乾,佢自己先肯飲小小水.....

到6點幾7點終於有小便去喇,今次既尿尿係無血,我懷疑可能尋晚先比佢食藥,藥力無咁快發揮,所以尋晚都一直屙血尿...到7點幾又灌佢飲水,我諗我總共灌左佢飲成半樽水家喇,今次d藥比上次開得勁左,happy食左無耐就會見佢好累,好想瞓覺咁....希望佢乖乖地瞓多d,飲多d水,食埋d藥~~就快d好返啦...