2009 澳門之旅 Day 2

2009-08-14 (金)

因為尋晚夜訓, 所以今朝唔想太早起身, 十點左右先落到去樓下食早餐.  嘩, 乜原來峰景餐廳係食buffet架, 仲要排隊......  排左差唔多半個鐘先入到去, 但係只可以食到十一點半.

唔知係咪因為遲落去, 已經無咩野好食....

第二次出去攞野食先見到煙三文魚, 呢樣算係全餐最'貴'價既食物

等左都幾耐先攞到呢兩塊waffle

總括黎講, 呢間餐廳真係唔似係喺五星級酒店裡面!! 食物番'貨'番得慢都算喇, 啲碟番得仲慢  食到尾聲既時候, 我行到最尾尾先見到兩隻碟咁大把囉!! 地下又chi chi lump lump....真係好唔掂.  啲食物都好一般, 加上小m病情惡化左少少, 無咩胃口, 所以一個鐘都夠食有凸...

食完野我地仲留左係威尼斯人行下, 因為尋日仲未行晒~

一點左右我地就搭shuttle bus出碼頭.  威尼斯人, WE WILL BE BACK!!!

落左車就行過去漁人碼頭

船飛既package包左兩張麥兜迷宮既入場劵.  好彩唔駛錢咋, 個迷宮都幾細, 得以下三個大公仔可以影下咋.

影完麥兜大m部相機又少左一格電, 而且天氣又好熱好晒, 所以喺漁人碼頭都唔係影左好多相...

臨走前去左"懷舊一條街"抖下同食左兩個刨冰~

跟住又行番去碼頭搭shuttle bus去永利, 再由永利行去新葡京附近既陸軍俱樂部

仲有陸軍俱樂部後面既保安部隊博物館, 不過果度無野睇既, 睇地下個層有啲展品, 上面好似係office唔上得.  但係大m都有收獲噃, 就係喺汽水機買左罐可樂, $3咋!!

之後就繼續行行行, 一路行去大三巴果頭.  沿路仲俾我地見到喺電視介紹過果個圖書館

以家澳門既路牌大部份都已經換晒做新款, 呢兩日只係喺大三巴果邊見到好幾個舊款路牌.

盧家大屋都係我地其中一個想去既景點, 唔覺唔覺沿路就見到佢.  屋裡既佈置仲保存得幾好, 入到去可以隨便行隨便影相, 只係有小部份係攔住.  而且仲係免費參觀, 好過香港果啲乜乜博物館啦~

背後呢間小食店我無幫襯呀! 咁做乜影佢?? 之唔係因為'花樣男子'囉, 佢寫住有喺佢呢度拍呀, 咁咪影張相留念囉 (其實都幾無聊啊~~~~)

好喇, 終於行到去大三巴~~ 途中我同大m講: "其實好多景點去一,兩次就唔會再去, 但係點解次次去澳門都硬係要去一去大三巴先似去過澳門咁既呢??!!"

行左咁耐真係好熱好辛苦, 快啲搵地方抖一抖先~ 大m話呢間"西灣安記"既茶餐廳旅遊書有介紹過, 所以就入去食個tea.

雖然小m有啲喉嚨痛, 但係黎到澳門豬扒包唔可以唔食呀!  個豬仔包好香脆, 而塊豬扒又有炸過, 真係好好食噃!!! 加上小m中意硬豬仔, 香港果啲'軟'豬仔唔係我杯茶!! 下次黎澳門要再黎食過呢個豬扒包先得!!

食飽飽又係血拼既時候喇, 呢間NaRaYa有三層, 呢款式好似比威尼斯人果間多少少咁噃~

大M今次話唔陪我入去揀袋喇, 浪費佢影相既時間噃, 所以我叫佢自己四圍去行下先.  最後我比約定時間遲左大概廿分鐘先出番黎  (其實仲想留耐啲架....)

眨下眼又到左七點幾, 天開始黑...

臨走前當然去手信街買啲手信走

食完個tea我地都唔肚餓, 所以去明記買串牛柏葉醫下肚就算, 無正式坐底食dinner

最後一程車都係行去搭免費shuttle bus~

去到咁岩又係'吉祥樹'既show time, 我地終於都可以由頭到尾睇一次喇, 就係咁我地既旅程劃上一個完美既句號~~~

回程既turbojet好定, 好明顯去程係exceptional case

呢兩日一夜玩得好開心, 啲新酒店好靚~ 小m好回味呢次澳門之旅, 希望好快又會再去過喇!!