迪士尼遊記

19/9/07    星期三

無錯無錯，我同阿嬌上星期五一早攞咗AL，一直都未度掂好邊好，最後竟然喺星期四夜晚11點幾扑搥決定去迪士尼~ (真係好彩星期五去，去完星期六就壞車喇....)

早幾日就放咗我喺米老鼠高速公路飛馳既英姿俾大家睇啦，今日就等我做返個精華回顧先~~~

我地一早8點半出發 (仲早過返工)，未夠10點已經喺佢門口等入場喇。一得知我地去迪士尼搵米老鼠，天師仔即刻報名話要去(莫非佢好肚餓~?!)。其實仲想帶埋阿豬去架，但我驚佢俾米老鼠嚇親~

一入去第一件事就去咗明日世界度玩 Space Mountain先。咪睇我同阿嬌喺上面幅相個樣咁投入，你再睇真啲其他乘客就會發覺大家都無咩表情........老實講，香港的 Space Mountain，我同阿嬌都覺得喺佈景、速度同高度，都差幾皮........

玩完Space Mountatin一出黎，就見到我偶像 - 巴斯!!!! 平時扭蛋係咁豪唱啲5蚊10蚊都係為咗抽佢，今日有幸會真人，直頭癲咗!!!!!!!!! 佢仲要同我地一齊擺甫士呀~~~~~~~ 巴斯!!! 我愛你~~~~

嘩~~~~~好多3眼怪呀!!!!!!!! 等我都黎怪獸埋一份先

專業攝影師又嚟了~~~~ 入嚟迪士尼玩喎，阿嬌又點會放過每一個拍攝機會呢

一個人既潛意識係會不知不覺咁浮出嚟既。就睇吓上圖，就白貓係姣咗少少咁擺個"咭pat"既甫士，阿嬌既咸豬手終於忍唔住了!!!!! 阿嬌~~~~~~你當我死架?????!!!!!

好鐘意坐旋轉木馬，好童話好夢幻。最重要係可以同好多小朋友一齊玩~ 你睇我隔離呢位小di di幾可愛~~~~~~~~~~~~

我前面呢兩位仲可愛呀!!! 尤其左面呢位，老人廿年依然可以同啲小朋友玩得埋

"話正多~合我心~為您煮咖啡~~~ 味帶香~又帶甘~是那黑咖啡~~~~~"

呢個世界真係好奇怪，越核突既野反而越受觀迎........ 就好似上圖中既綠魔怪獸，喺水花遊行中數核突佢都數一數二，但偏偏惹嚟好多人要飛身撲出去"摸摸"，更吸引到數部大小炮及傻瓜機既青睞，係咁刷佢...

妖女呀~~~~妖女呀~~~~迪士尼人物之中，佢地都算最妖精同埋擾攘，成日都幾條"女"一齊出產品，好似即影即有相、扭蛋、文具、小朋友party服飾等等。而家，仲目無法紀當街蝦細路tim!!!!!!

咁樣，先係全家福嘛~

見到我地戴住兩頂咁可愛既帽喺迪士尼入面擾攘兼遊街示眾，都知道我同阿嬌再一次為藝術犠牲。拿拿拿，未算，我地仲要係眾目睽睽下做出 "女人撐起半邊天，男人再撐埋另一半" 既動作，真係.........可一不可再

這邊廂，我盡情購物、滿戴而歸咁喺迪士尼夜景下留倩影~

那邊廂，阿嬌就好慘情咁幫我拎住啲戰利品，累到無眼睇

跟住......仲要喺人地張櫈度瞓著埋........(雖然大家睇唔到佢個樣，但佢真係合埋咗眼的......)

大家有機會去迪士尼既話，臨走嗰陣記得喺入口既噴水池度影返個夜晚look，比起日頭靚10倍啊~~~~

暫時報告咁多先，要瞓了.......