富貴墟

9/9/07   星期日

星期五晚食完麥包餐飯，同阿嬌去咗遊車河。佐敦直產入屯門、八鄉再去返上水。經過間甜品舖，就入去試吓喇。

呢間彩虹，據我所知喺大埔都有間分店，仲好似幾出名的… 山場水遠嚟到，就叫咗幾樣特式甜品：

阿嬌點既，呢個所謂的 "雪花" ，其實都係大小西米加舊雪糕，但咁啱阿嬌叫咗個薄荷雪糕，溶咗之後，dull野又變咗薄荷西米露，又幾好食。

有別於傳統既花生糖不甩，呢個叫 "杏沙糖不甩"。都係啲 "點" 既粉變咗做杏仁同黑芝麻。不過不失，但就 "拿" 度我粒飛滋好鬼痛~

我就點咗個呢間野既鎮店之寶 - 愛心甜品。係一杯椰青，加兩粒紅色既雪米糍。開頭都覺得騎，點解雪米糍會紅色呢？原來……出面個皮係荔枝味的。

入面仲有4粒心形既苟蒻。本身我不太好椰青同荔枝的，所以呢杯野…麻麻地啦。不過都有啲特式既……

食緊甜品嗰陣，阿嬌係咁用手機上網，唔知睇乜。食完之後，又渣架車係度dull嚟dull去，終於俾我發現佢停咗喺一座好熟悉既建築物前面……

登登登櫈~~~~~~~~聯和巿場！！

原來阿嬌一路都搵緊聯和墟個聯和巿場。唔知你有無睇楊千嬅同陳奕迅演既 "每當變幻時"，入面個 "富貴墟" 就係喺呢度實地取景架喇。不過我地嚟度嗰陣 "富貴墟" 個牌已經拆咗了… (阿嬌話之前拍完齣戲，政府無拆到個牌的) 

有啲野真係講緣份，嚟到先知原來佢就嚟拆了…… 真係好彩真有機會見佢最後一面。時代變遷，舊既唔去，新既唔嚟。文化遺產好多時就做咗現代化既犠牲品。你見天星碼頭呀、皇后像碼頭呀、都無一倖免。變係大自然既定律，無人可以阻止。所以而家仲擁有既，真係要好好珍惜了。

P.S. 有機會都買返 "每當變幻時" 隻碟嚟睇，佢就係圍繞由97到而家香港轉變呢個主題，叫大家珍惜擁有既野。都拍得幾感人的…