鬧巿中的清泉

日本之旅：

.........................

大家睇完上面既相，係咪真係覺得我去左日本呢？之但係，明明呢幾日又見過我返工同排舞.....何來時間去日本旅行呢？

當然，以上都係我搞的一個小gag。其實呢度係..........

.......................................................

無錯。可能你都成日經過，但就重來無諗過佢有乜咁值得行。我都係！直至今時今日先發現呢度係個仙境。阿嬌呢期愛上影相，周不時都會拿住部相機呢度去嗰度去，影花影草影蝴蝶。咁啱琴日週末，佢就話帶我去影相。去到鑽石山左近，我都估到係去寺蓮淨苑......對面既南蓮園池，因為呢頭係得呢度有d境影吓。不過，你未親身行過，真係估佢唔到，喺一個四周都係石屎森林，車來人往既巿區入面，可以有個令人抖抖氣，暫時 "遠離" 煩囂既天堂。

一入到去，四周圍係花草樹木唔在講，但估唔到，四周圍都係 "實Q"。阿嬌話，呢度守衛好嚴，一草一樹一磚一瓦都保護得好好，好似阿嬌影相唔覺意隻腳搭左喺個石膊咋，幅相都未曾影，啲實Q仲快過個快門，即刻走黎話佢。四周圍真係一塵不染，一舊垃圾都無，而且仲周不時有啲阿姐係度清潔。咁我又覺得幾好喎，你知香港人真係唔多自律，就因為呢度守衛森嚴，個環境到而家先仲可以保存得咁靚。好似上次我去濕地公園，先親眼目睹幾多細路掉垃圾入啲湖度。個公園先新開張，就俾香港人自己污染返........

恕在下孤陋寡聞，見佢請咁多實Q同清潔阿姐，仲有個鬼咁古色古香賣紀念品既小屋，我以為係邊間私營公司搞架啦。但阿嬌話係政府俾錢寺蓮淨苑起架喎。今次我又幾欣賞政府喎，我覺得香港應該要起多幾個呢類形既公園，綠化環境之餘又可以洗滌身心。呢一代既人，日日夜夜淨係對住部腦，唔係上網就係睇吓啲股票今日升定跌；每天返工放工，你又何嘗會留意每天既日出日落呢。生命既喜悅，有時不在乎你搵到幾多錢，升左幾多次職，而係在乎你識唔識享受生命，珍惜你而家擁有既，上天賜予俾你既，即使係微不足道似你剛踩到既一條草，甚至你呼吸到既每一啖新鮮空氣。

唔........今日飲大左兩杯，所以吹多左兩咀，望大家多多包涵，嘻嘻~

好，講多無謂，去片最實際：

未去到個入口已經見到都巿少有既彩虹!!!

阿嬌係度影咩呢？原來係影個水車....

我影起相黎，都好認真的

呢個咁古代味重既木屋仔係乜東東黎架呢???  唔......求籤既？捐錢箱？

錯錯錯!!! 原來係分類垃圾桶啊~

真係唔係有心，但佢呢個設計，串野堯轉黎轉去，好多人包括在下都係用手掂完睇睇下先發現 "請勿觸摸" 呢4個大字....

廣告時間：hocc - 木紋

廣告時間：hacken lee - 最新大碟 My Cup of Tea

睇完呢兩幅寫真，係咪覺得喺阿嬌既攝影技術下，我既素顏look都"扼"得吓人呢~  (拿拿拿，俾俾面唔好嘔住......)

為免大家真係去左嘔同埋發誓以後都唔再黎呢個blog，整返4幅靚到成張明信片既風景相過你平復吓心情喇~

隨住阿嬌投資落相機同鏡頭既金額一日千里，佢既攝影技術都真係越黎越耍家既

拿，以下呢幅係佢今日既新作：

點睇？都真係唔到你唔服架~~