沖繩飲飲食食

去報名時旅行社職員同我地講沖繩係比較窮,最出名就只係苦瓜同菠蘿.心諗唔係咁大鑊呱,已經好似唔係咁多嘢玩,連食都咁差?咁仲去唔去好呀.好在睇翻旅遊書其實都唔係咁差,都應該有啲好嘢既.

好多旅遊書都推介牧志公設市場,地下買海鮮,二樓幫你煮,好有西貢或者鯉魚門feel.不過我又聽過有人彈話係呃遊客喎.一場去到,點都試下啦,做水魚都唔係第一次.價錢都係任佢開,講講下居然可以減成30%.仲送沖繩名產海葡萄做伴碟,我地就叫咗琵琶蝦加一啲其他魚既剌身,燒大蝦,苦瓜炒疍等.
琵琶蝦真係好正,又爽又甜,算係冇叫錯.側邊細細粒綠色嗰啲海葡萄就真係唔多掂.仲話係植物魚子醬添,冇錯一咬就係爆醬,不過裏面嗰啲黏液,滑潺潺咁....咦.

大蝦係就係好多肉,不過係雪藏嘢,冇乜鮮味.苦瓜炒疍(正確來講係苦瓜,午餐肉,豆腐炒疍)就唔識評.最出名既苦瓜切到紙咁薄.我估一個苦瓜可以做到十蝶炒疍.根本都食唔到味.唔知點解日本食親菜都係咁,好珍貴.總括來講呢度都唔算太離譜,不過好明顯係專為遊客而設的(啲伙記講普通話架).

其實我唔一定要貴嘢先食的,去首里城嗰日就去咗好出名既首里そば食麵.呢度聽講係長龍店.只做幾個鐘生意,賣晒就算.好大鼻.個湯係幾清甜,不過啲麵.....好硬,老實講唔好食,我覺得拉麵好食啲.可能我冇乜牙力呱.

又講下食貴嘢,沖繩人食豬肉最多,最出名係あぐ豬.不過牛方面都有石垣牛.我地就搵咗晚去食呢兩樣嘢,豬方面其實唔覺太特別,燒咗都幾香脆,但應該同普通豬肉差不多.石垣牛就真係一番好食.一係唔試,一係就試最好既,我地叫咗特選,啲牛肉淨係睇都覺得好靚(好可惜我唔記得影相),件件好似倒模一樣,鮮紅色加上平均分佈的油花(話唔定係罐頭).入口即溶但係又唔會食到成口油(咁咪即係好似午餐肉咁).不過真係貴得好離譜,唔好意思搞到其他人好肉痛添.

以往經驗都係跟旅遊書十之六七都係麻麻地,打游擊反而往往有驚喜,去shopping shop到冇晒時間就求其食餐麵,沖繩原來唔多興拉麵的,周圍都係得そば,只好叫幼麵等佢冇咁硬,間店冇乜嘢食,就只有豬軟骨及豬手係有肉既麵,嘩,真係好味而且好林,啱晒冇乜牙力既人.