吃喝玩樂@ Jack Jack 家

今日 Jack Jack 家誠邀我哋去佢屋企玩，而且兩位媽媽仲做咗 cooking mama，特別為我同大佬炮製美味小食添！

(左) Mo 仔：嘻嘻，究竟我哋兩兄弟咁齊心等乜嘢呢？！ 

(左) Mo 仔：咪就係因為媽媽同 Jack 媽為我哋準備小食囉！ 

Mo 仔：嘩～ 包得好靚靚的精美點心呀！    有三文魚燒賣同羊肉燒賣。

Mo 仔：咦～ 究竟媽媽整緊乜東東呢？！ 

Mo 仔：嘩～ 原來除咗點心之外，兩位媽媽仲炮製兩款小丸子 - 南瓜三文魚小丸子 + 蕃薯羊肉小丸子。    今次我哋兩兄弟真係有口福囉！

Mo 仔：好嘢，準備好，可以煮喇！ 

Mo 仔：其實兩位媽媽準備小食期間，我唔單止同 Jack Jack 落街行孖咇，而且我仲玩咗 Jack Jack 新買的尋寶玩具添！不過爸爸話我玩得特別另類嘅～ 人哋係要狗哋搵嘢食，而我呢........ 走咗去咬啲塑膠啊！   

Jack 媽：Mo 仔，你要咬就咬啦...... 咬爛呢個玩具都唔緊要o架，至多叫你媽媽買返一個新嘅俾 Jack Jack 之嘛！ 

(右) Mo 仔：除咗玩玩具外，Jack Jack 爸仲同我哋兩兄弟玩添！    相比之下，睇吓我幾冇耐性！

(上) Jack Jack + (下) Mo 仔：咦...... 我哋好似聞到啲香味呀！   

(左) Mo 仔 + (右) Jack Jack ：係咪有得食喇？！ 

等得好心急的兩兄弟。 

Mo 仔：嘩～ 雙拼點心新鮮出籠呀！ 

Mo 仔：另一邊的小丸子都新鮮出爐喇！ 

Mo 仔：新鮮出爐的南瓜三文魚小丸子，兩位媽媽都不約而同話外型有啲似咖喱魚旦，又有啲似金莎朱古力。 

Mo 仔：哈哈，呢兩碟就係我哋兩兄弟今日的晚餐，今次發達囉！ 

(右) Mo 仔：我呢隻為食狗開始等得不耐煩，差啲推跌圍爛，仲試過意圖跳過圍爛入廚房添。不過被媽媽及早發現，所以偷食行動失敗！ 

(左) Jack Jack：細佬，既然你跳越圍欄失敗，   倒不如學我咁...... 乖乖地坐喺度等，話唔定媽媽見我咁聽話，可以分多幾粒食呢！ 

(左) Jack Jack + (右) Mo 仔：等咗咁耐，幾時可以食呀？！ 

兩位媽媽：ok，而家可以開餐喇！ 

(左) Jack Jack + (右) Mo 仔：Yeah！咁你哋快啲開閘啦！ 

Jack Jack：好嘢，開餐喇，而且仲有兩碗俾我揀添！ 

Mo 仔：因為我食得太快，所以媽媽都趕唔切幫我拍低 video 呀！ 

Mo 仔：今日真係打擾了 Jack Jack 一家，不過我真係玩得好開心呀！    我要特別多謝 Jack 媽，今日辛苦哂你呀！你唔單止去買材料，而且今日一早已經預備好啲事前功夫（我的懶媽媽，  你真係要學吓 Jack 媽咁勤力先得喇）。

今次兩位媽媽第一次合作整小食俾我哋兩兄弟，   我同 Jack Jack 好鍾意食（當然啦，咁美味可口），就連同我一樣咁為食的爸爸，一見到食物的賣相咁靚，已經急不及待去試食，    仲大讚好好味添！（尤其係南瓜三文魚小丸子）

今晚玩得咁開心，又食又玩又拎，返到屋企我已經即刻攰到要走去覺覺豬喇！