Mo 仔受傷了~

2009年 9月18日（星期五）- 晚上九時半左右

昨晚我同爸爸如常帶 Mo 仔落街散步，沿途都是由我帶著已繫上狗繩的 Mo 仔去散步的。散步途中遇上一隻狗仔（都係繫上狗繩），當時 Mo 仔善意地同對方聞聞鼻子打招呼的，不過突然間嗰隻狗仔一口咬向 Mo仔，Mo 仔已經即時彈開，而我都立刻扯回狗帶，令 Mo 仔返到我身邊。之後爸爸即刻幫佢檢查，初時見冇受傷以為冇事（但當時街上係比較昏暗），再加上當時 Mo 仔仍是笑瞇瞇，而且沒有大叫或有什麼異樣。

我哋再行多幾步時，見到一位街坊同佢嘅狗狗，Mo 仔見到朋友仔好開心，仲開心到側哂身趴在地上。點知...... 就喺呢一刻，   我發現 Mo 仔的前腳有血呀！！我當然焦急得大叫 "Mo 仔流血呀！！"，爸爸見狀即刻抱起他並檢查傷勢。

噢.......... 天呀～     Mo 仔的左耳附近不停地流血，而且近頸部位置的白色毛毛也染有血跡呀！！見佢不斷地流血，仲搞到抱住佢嘅爸爸成手都係佢啲血，我當時真係好驚...好焦急，頓時不知所措。而剛才相遇嘅街坊見狀即刻向附近的大廈管理員拎好多紙巾俾爸爸，以便幫 Mo 仔止血。當然想到 Mo 仔一定係俾頭先嗰隻一口咬向佢嘅狗仔咬傷喇！由於我哋當時咁啱喺 Jack Jack 屋企樓下，在這危急時期，我唔理三七廿一，即刻用對講機同 Jack Jack 媽講仔被狗咬傷，可否即刻上佢屋企幫 Mo 仔的傷口清洗消毒。

真係好彩當時有 Jack Jack 媽的幫忙，而且提供地方及急救用品，令我哋可以即時為Mo 仔消毒及包紮傷口。而爸爸運用多年前學過的急救課程來幫 Mo 仔清理及包紮傷口，    佢仲話估唔到第一次急救的.......... 竟然係自己的寶貝狗狗呀！爸爸在包紮傷口前檢查傷口的來源，    好彩只是咬傷耳仔，而唔係頸部，否則後果真係不堪設想呀！

但係........ 幫 Mo 仔包紮傷口時，佢好似唔知道自己受傷，仲開心地笑嘻嘻及郁來郁去，簡直係增加爸爸包紮的難度啦！有時止血後，就係因為 Mo 仔仍然處於興奮狀態，有時他的大動作或 fing 耳仔，令到傷口再爆開流血呀！！我都知 Mo 仔被包紮住一定唔舒服，見到佢咁，我個心真係好痛，仲喊咗出嚟添！我哋喺 Jack Jack 家逗留一個多小時後，見 Mo 仔情況穩定些，再沒有太興奮的心情，我們才回家去。

我們返到屋企後再幫 Mo 仔包紮好傷口並帶上喇叭罩，好像止了點血。初時都有諗過即時帶 Mo 仔去廿四小時獸醫診所睇急症的，但後來爸爸再仔細檢查過後，見 Mo 仔傷勢不是太嚴重，而且佢返到屋企後仍然好開心，精神好好，而且胃口仲唔錯添，於是決定都係明天一早帶佢睇 Dr.Betty。

  經過幾次包紮後，Mo 仔也倦了～

  見到 Mo 仔咁... 我心都痛哂！

**********************************************************************************************

2009年 9月19日（星期六）- 早上

昨晚我整晚都瞓得唔好，因為覺得好內疚，內疚當時俾 Mo 仔接近嗰隻狗仔而受到傷害，又好擔心 Mo 仔的傷勢。不過 Mo 仔瞓得好好，仲扯哂鼻鼾添！但今朝一起身佢以為有得去街街太興奮時，再加上又經常 "fing" 耳仔，傷口又爆開並流血，啲血仲濺到地上添。 

好彩今早診所內仲未有好多人，所以等咗一陣就可以見 Dr. Betty 了。經過佢詳細檢驗後，証實 Mo 仔左耳的傷口被咬傷，被咬開咗少少肉，    好彩並冇大礙，不過要剃咗耳仔啲毛毛，以便幫 Mo 仔清洗及消毒傷口，再噴一些止血粉來防止再流血。Dr. Betty 同我哋講，幸好爸爸在昨晚事發後仍然依時餵 Mo 仔食抗生素，所以佢耳仔的傷口沒有發炎同腫脹啊！（事緣上星期我哋因 Mo 仔的耳仔敏感和發炎，所以帶佢去睇醫生，要食藥治療。）

Mo 仔由去到診所至睇症期間都經常傻笑，    就連 Dr. Betty 和 Karen 護士都話佢實在太天真太傻，單純得被狗仔襲擊都唔識驚，唔知痛，自己受了傷仲笑瞇瞇呢！Dr. Betty 說可幸的是 Mo 仔的傷口接近耳邊位置，而且傷勢不是太嚴重，不需要縫針，佢叫我哋放心，只要定時食藥，同埋防止傷口再流血就得喇！我和爸爸聽了後也放心得多。不過返到屋企都要時刻睇住 Mo 仔，以免佢太興奮，又或者成日 "fing" 耳仔而弄傷傷口呀！

  傻笑的喇叭小王子 - Mo 仔在診所內等候～

  睇完醫生後的 Mo 仔依然係度傻笑，一啲都唔似受了傷的狗狗！

  醫生幫 Mo 仔剃咗啲耳仔毛後，在傷口上噴些止血粉。

**********************************************************************************************

在這裡，      真的要非常感激 Jack Jack 媽，她在 Mo 仔呢次意外提供好多幫助，而且仲協助爸爸幫 Mo 仔包紮傷口。而 Jack Jack 也非常之乖，可能佢知道細佬受傷了，所以他靜靜地坐在客廳一角，沒有特別八卦或撩 Mo 仔玩玩。而很不濟的我，只是負責安撫 Mo 仔，還替自己當時俾佢走近嗰隻狗仔打招呼而內疚呢，昨晚真的擔心得不斷流下眼淚來。

  Mo 仔，真係好對唔住呀！估唔到只係落街散步一陣，怪就怪媽媽不小心，沒有阻止你近距離接觸嗰種狗狗，而令你受傷流好多血，仲要你大熱天時帶住喇叭罩受苦，又要在灑止血粉時感到 "嗱嗱地"，我感到好內疚，好心痛...心痛得暗暗垂淚！    原本今日和 Jack Jack 哥哥的約會也要取消，而且最近呢個星期都唔可以出街玩玩呢！

Mo 仔，你真係好天真好單純，毫冇危機意識，就算被狗狗襲擊都唔識驚，流咁多血都唔知痛，受了傷還經常傻笑，  真教我又哭又笑呀！想起事發時，媽媽真係驚到不知所措，感到好內疚，搞到喊咗出嚟添～ 幸好爸爸和 Jack Jack 媽能夠冷靜處理。我和爸爸都知道... 你而家要帶住喇叭罩，而且對耳仔紮住繃帶又熱又唔舒服，不過我哋都係想鞏固你嘅傷口位置，唔想你失驚無神 "fing" 耳仔時整到傷口又流血嘛。Mo 仔，你乖啦，唔好再 "fing" 耳仔啦... 忍多幾日等傷口結焦後就舒服好多，好快好番o架喇！