週日離島遊 (坪洲+愉景灣)

Mo 仔 : 今日我哋一家三口第一次去坪洲玩呀!! 

Mo 仔 : 爸爸... 其實我哋今日嚟坪洲做咩呀？！ 

Mo 仔 : 啊...... 原來嚟坪洲行山。今日雖然天陰陰，不過冇乜風，仲有啲翳焗，後來先知道原來今日的空氣污染指數都幾高呀！ 

Mo 仔 : 媽媽，乜你出發前冇睇天氣報告呀？ 你想熱屎我咩 ！ 

Mo 仔媽 : 天氣報告只係講多雲乾燥咋~    我都唔知道原來今日的空氣污染指數咁高o架！怪唔得我都覺得今日坪洲的空氣都麻麻地啦！

Mo 仔 : 媽媽，我同你講笑咋~    其實有得去行山，我已經好開心喇！至多我行到熱就趴係度休息一陣囉！

Mo 仔 : 今日我哋嘅目標就係手指山。 

Mo 仔 : Oh my god~~ 原來要行咁多級樓梯先可以上到去手指山o架？ 

Mo 仔 : 媽媽，乜你行得咁慢o架？都叫你平時做多啲運動啦！好彩我同爸爸一齊行上嚟啫，我哋步伐一致啲嘛！ 

Mo 仔 : 我哋終於到達手指山嘅山頂喇！行咗咁多級樓梯，真係要唞唞先~ 

Mo 仔 : 景色真係唔錯呀... 可惜今日能見度好低，周圍灰濛濛一片。 

Mo 仔 : 行完手指山返去市中心時，見到人頭湧湧啊！  原來今日係龍母誕呀！  唔怪得頭先搭船入坪洲時咁多人啦！

Mo 仔 : 咦... 咦... 咦... 行完坪洲後，我哋又搭船去邊呀？ 

Mo 仔 : 啊~~ 原來坪洲有街渡去愉景灣，所以我哋就順便去愉景灣行吓啦！ 

Mo 仔 : 我仲係船上見到一隻好可愛的 poodle 添~ 

Mo 仔 : 話咁快架船到達咗愉景灣喇！ 

Mo 仔 : 等我周圍行吓先~ 

Mo 仔 : 嘩... 呢度環境真係唔錯喎！    據聞仲好 welcome 狗狗添！

Mo 仔 : 由愉景灣仲可以遠眺廸士尼酒店呀！ 

Mo 仔 : 雖然愉景灣的環境唔錯，  可惜媽媽好想去幫襯嘅餐廳唔 welcome 狗狗，而且啲侍應態度唔好，搞到媽媽好掃興，寧願去食個 quick lunch 算喇！

Mo 仔 : 食完 lunch 後，我哋搭船出番去中環。 

Mo 仔 : 話時話，點解又搭船嘅？    計計吓... 原來呢程係我今日第五程船呀！

(屋企 => 中環 => 坪洲 => 愉景灣 => 中環 => ??) 

Mo 仔 : 爸爸同我講，而家我哋搭緊船返屋企。好嘢，可以返去洗白白喇！ 

Mo 仔 : 今日去咗兩個離島玩，真係有啲攰吖！ 

Mo 仔 :   等我眠一眠先~ 媽媽，落船前記得叫我起身呀！