毛糖回歸　－　糖糖剪咗新髮型

出山喇回歸喇毛糖返黎喇哈哈

我竟然懶到將毛毛糖糖個卜荒廢咗幾個月咁耐抵打啊

上幾個月，糖糖成日嘔毛嘔餅，睇咗兩個醫生，又驗血又照X-Ray，食咗成個月藥，醫生話估計係糖糖平時lam咗太多長毛落肚，排唔清又嘔唔哂，結果食咗一排腸胃蠕動藥(正常便便，便中有毛)，仲有以後都要戒口，就好番喇依個其實係糖糖嘅老毛病，好多年前病發時，佢屎過番生咁滯，要開刀攞番啲毛出黎，仲切咗少少腸添所以由幾年前開始，每逢夏天，糖糖都要剪毛靚唔靚都係其次，最緊要對身體好啲，又涼爽啲添

糖糖之前病咗成個月，我心都實埋之後又同貓叔叔鬧大交，都無心情出卜依家心情好番同貓叔叔又好番，但係又懶懶閒，荒廢咗個卜了

襯糖糖未剪毛，好襯長毛留倩影呀

糖糖好顧及儀態架，坐同瞓都好優雅嘅

人貓成日爭電腦椅坐，貓地更加當床咁瞓，你睇糖糖瞓得幾得意，只有佢先會雙手掩實塊面咁瞓覺架咋

可能佢覺得光得滯，燦住佢瞓掛

最近天氣太熱，糖糖熱到日日反哂肚Dum，咩優雅儀態都唔理得咁多，散熱最緊要

唔係我想唔開冷氣熱屎貓地架，開得冷氣多，貓婆婆會鬧人架

糖糖一身長毛，雖然有食吐毛膏，但係佢熱到唔願郁，對腸胃蠕動好有影響，郁動多啲好啲架

唔駛唸咁多喇，一於剃光光，你年年咁剪都慣哂啦

帶糖糖去剪毛嘅寵物店係比較貴嘅，因此曾經聽講有寵物店為咗幫貓狗剪毛容易啲，動物無咁反抗，用少量麻醉氣俾貓狗聞完先剪。糖糖年紀大又體弱，所以揀間好啲嘅，來回過海搭的士去，依幾年都剪得好好，糖糖仲好乖無反抗，連剪毛姐姐都讚佢乖添就係咁，糖糖就變身成.......

全身剃光光，淨得條獅子尾fing fing吓

自從糖糖剪咗條獅子(豬)尾，毛毛成日想捉家姐條尾黎玩

對手仔同腳仔就留番啲毛，剪到成對Boot咁樣

糖糖次次剪毛，我最鍾意就係佢對白Boot仔，勁可愛呀

至於糖糖獨有嘅啡黑中間分界，就剪到平頭裝，長髮靚女變咗男仔頭

個身無哂毛，涼浸浸，唔開冷氣都無問題啦

糖糖變咗檸檬頭，希望Fans唔會走

剪完毛第一晚，糖糖可能唔慣個身無哂毛，成晚大大聲叫，我同妹妹都無覺好瞓之後第朝開始就無事，仲活躍咗周圍走，食嘢仲多咗添，可能無咁熱有番胃口吧

根據以往經驗，糖糖啲毛長得好快架，依個look好快就唔同啦，幾個月就長番哂，Fans們放心啦

我幾鍾意糖糖嘅短毛look，覺得好可愛，尤其是過多一兩個月長番一吋毛，十足十細佬毛毛咁樣嘅短毛貓，超卡娃依哩

掛住毛毛嘅Fans們，下個卜會有毛毛出場喇，大家密切留意啊