18-Dec-2009 - 結婚4週年(絲婚Silk wedding)

好感恩! 我們這一家已經組織了四年.
今年又進入另一個階段, 因為多了心心在我們當中.

慶祝活動, 好想帶埋心心一齊, 所以決定去食buffet, 又想順便帶心心去睇下燈飾(佢真係好鐘意望燈的!), 於是上網找一找, book左尖沙咀馬可孛羅太子酒店香味屋的「和牛爐端燒」dinner buffet, 在OPENRICE download左張八折coupon.

爸爸放工回來, 心心食飽糊仔, 五時許我地就出發啦!

雖然心心好眼訓, 但佢沿途都冇訓, 好八卦咁四周望, 直至爸爸駛入停車場泊車, 佢剛剛合埋眼訓左. 但當我抱起佢落車, 佢又醒左唔訓, 又四圍睇野. 幸好佢咁眼訓都無忟憎, 乖!

首先, 我地先到酒店對面的荷花行了個圈, 買左d野比心心. 然後在換片室換左片.
然後我地就到香味屋入座啦!

安頓好後, 爸爸拿相機出來, 因為人未算多, 有個侍應主動過來問要不要幫我地影相. 真係好, 唔該晒!
這是我們當日唯一的全家幅.

之後, 爸爸媽媽要開始覓食, 心心當然被放在BB車啦! 佢都算乖, 只是開頭摟左幾下計, 跟住就好安靜咁培養心情訓覺, 好快就訓著了. 我地自然可以安樂地蹬枱腳啦!

45分鐘後, 隔離有個BB仔不停大喊, 弄醒了心心. o岩o岩夠鐘食奶奶. 食飽後又放佢落BB車, 今次比佢坐直, 可以睇到我地, 佢又可以玩玩具, 咁又無驚無險過左30分鐘 (不過, 不停望住我地d野食! 好似好想食咁. 哈!). 真係好乖﹑好合作呢~ 抵o錫!

爸爸媽媽都開始飽飽地, 抱起心心影下相, 然後埋單走人去行下.

我地一直從海港城的尾尾行過去海運, 本來想同心心影下的聖誕佈置, 但沿途都沒有佈置.
到達海運大門口, 人多到不得了, 而且出面真係好凍呀! 所以, 我地放棄再向前行.
影了幾張相就回程啦! 等冇咁凍, 下次再帶心心睇燈飾吧!

其實, 個buffet都冇乜特別, 只係普普通通, 又未能睇到燈飾, 確實有少少失望.
但係無論如何, 一家三口齊齊整整﹑健健康康...都過了一個愉快﹑滿足的晚上. 感謝主!