媽媽好

母親節又到了, 大家有無特別為媽咪慶祝母親節呢?

我同妹妹就揀左上星期一家人同媽咪提早慶祝呢個節日, 避免左喺正日時嘅擠迫情況, 一來又可以食得舒服d, 二來d食物都會好味d, 不過點得好la, 其實媽咪都明白對她有心, 日日都係母親節喎!

講番自己對媽咪的感情, 有時她就像大人, 又有時她也像個細路, 有時我也要會充當媽媽嘅角色, 叫佢唔好食咁多呢樣果樣, 免得她會容易生病, 可能大家會問點解我會咁長氣....咁囉唆.....

原因係因為她在十年前曾患上白血病, 骨髓做唔到血, 故要接受骨髓移植手術, 幸好我四個舅父其中僅有一個舅父剛剛和媽咪的血型吻合, 可以接受移植, 而我地一家人知道媽咪可以從黑暗裡找到曙光時, 又開心又擔心, 因為做完移植之後可能有很多後遺症, 又或者有些人捱不過而去世 。

喺這段時間除左媽咪自己要去克服之外, 我地經常都要進出醫院, 陪她去覆診, 有段時間也要在家幚媽咪打針, 時間慢慢的過去, 她的身體狀況一年比一年改善了, 由最低八十幾磅擧升到而家一百零幾磅, 所以她現在的理念除了要開心之外, 最重要係食得, 瞓得, 玩得, 食到自己最喜歡的食物, 想食就食(仲經常打邊爐, BBQ, 食壽司), 想玩就玩(她的活躍程度係我嘅幾倍), 你地話我有咩辦法唔囉唆呢? 唯有叮囑佢食還食, 唔好食得咁肥膩啦!

係度我想表揚吓我媽咪, 她真的很堅強, 很有鬥智去克服困難, 有一個善良的心, 她除了不計較, 只會付出之外, 仲不會偏心我和妹妹, 而且仲好鍚爸爸添, 我好希望來生她也是我的好媽媽。

我另一位媽媽, 當然是我奶奶, 我地咩都可以傾可以講, 有如多了一個媽媽一樣, 照顧得我地好好, 她除了將屋企打理得井井有條外, 有好嘢一定留番比自己嘅仔女, 將最好食嘅煮哂比我地食, 仲可以打包番屋企第二日食添,  喺度好多謝您…奶奶辛苦了妳。  

祝天下間的各位媽媽, 貓媽媽都身體健康, 有仔女鍚, 有貓咪鍚, 開心享受每一天, 珍惜身邊所擁有的人和事, 與及我地最鍚嘅寵物。