準備落鑊

炒餸成日都話要首先燒紅隻鑊, 跟住先落料炒.  股票投資都係有d相似.  我並唔係贊成投資股票其實係"炒"股票, 相反, 一隻股票最後上升定下跌, 始終都係要睇番業績, 間公司有無前景, 而前景又係米可以化為真金白銀既 hard dollars.  但係, 好多時一間公司既股價, 以我觀察所得 (特別係二三線), 話之你間公司有幾巴閉, 搵幾多錢, 有幾好既市場前景都好, 係無人賞識既情況底下, 股價一樣可以浮浮沉沉無起息, 但係當然蚊型戶如我等既所謂"賞識" ---- 做鹽都唔咸啦!  有意思既賞識必須來自機構投資者, 一間二三線公司, 在股價飛升前通常都已有"一定數量"既大戶已經入左貨, 跟住其他大戶跟住增持時, 就係股價開車之時, 慢慢到左呢間公司已變成"基金愛股"既時候, 就係開始去搵下一間增長型公司既時候了.

勤加緣呢間公司, 本人認為有前景, 有市場, 有人脈, 有業績, 有企業投資者, 只欠所謂"東風" ---> 就係大孖沙們既參與, 小弟大大話話已追縱此公司一年時間, 奈何小弟並非一個 qualified 既伯樂, 股價絕不跟我既個人主觀走, 但係最近發現, 此公司股價開始有起色, 早前既盤路情況顯示有心人已在密密收貨中, 而且股價都開始緩緩爬升, 一幅慢火煎魚格局.

今天再升2格, 收2.37, 雖則升幅並不大, 但係從路情況看來, 給我更大信心 --- 真係有個有心人係背後做緊野....  全日成交1.79 million 股, 其中1.46 million 係向15:40-16:00之間做既, 仲全部都係主動買盤, 詳情如下表所列. 只問一句, 邊個會"怎"住見到ask價有十萬股就即係攞十萬股, 之後又唔再搶上去, 靜心等候沽家又掛出十萬股時, 佢又出黎"唔該"一聲又掃左?  1.80 million 成交股數對此股來講都唔野少, 相對淡靜時只有30萬股成交或更少. 

當然, 有人十萬十萬股咁掃, 實有另一人十萬十萬咁掛沽, 呢d唔算沽壓咩?  咁又要諗番, 邊個主動去做成一單deal先?  現在看來係買家比較積極掃貨, 而且股價慢慢咁少少,少少咁上, 正合我意.  反而一日升20%果d我又未必"坐得穏", 好可能即日已沽出, 賺個20%算數, 而走左雞後面果100%甚至更多.  提自己買股票係求回報, 唔係求刺激, 想刺激通常都要付出代價, 大佬, 坐過山車唔洗比錢呀? 

勤加緣, 繼續看好.