太平清醮2008

12/5：晴天

年年長洲太平清醮我都話想去，但最後都冇去到得個講字．．．點知前晚我一online MSN阿yung話攞到“扒士”問我有冇興趣一齊去喎，咁就o岩o西啦！

朝早8點同阿yung，阿Dom食完個早餐就搭船入長洲～一出碼頭已經見到周圍都係人；影相，買平安包食，買紀念品呀咁，好熱鬧～我o地沿住碼頭慢慢行，雖然係人多，但未算擠迫，一路都暢通無阻，可能時間尚早掛～行經賣平安包好出名o既郭錦記，見到TVB記者方健儀o係店前拍緊報導～期間有o的路人甲乙丙o係佢面前出出入入，結果見佢拍o左都有5、6次先收貨～之後行到北帝廣場，o係果度周圍睇下同影相～

晏晝聽到位阿姐講，飄色巡遊約莫會o係2點幾開始，咁我o地去食o的o野先～出返碼頭，發覺比起朝早多o左好多人，人潮擠擁得極之難行；而眼見周圍o既食肆都坐滿人，結果我o地都係去返老麥咬包～因為習俗上呢幾日係齋戒食素o既關係，老麥特別出o左隻“脆香素菇包”，平時食唔到o架喎，咁梗係試下啦！味道都OKo既～

食完o野入返廣場，周圍已經封o左路；見到o的巡遊隊伍o係隔離球場集合，我o地走入去影相～影到咁上下去返廣場搵定位等飄色巡遊開始～當巡遊正式開始，現場氣氛即時升得好熱烈！巡遊車上o既小朋友個個都打扮得好可愛～由於今年係北京辦奧運同埋馬術比賽o係香港舉行，所以見有o的巡遊隊伍都用呢件事o黎做主題；o架巡遊車整o左隻馬仔o係度，而車上o既小朋友著住成套騎馬裝束，好型呢～另一隊係一班十零歲年輕人組成o既銀樂隊，一邊行一邊吹奏“We Are Ready”，表現好合拍好純熟～至於其他隊伍亦有醒獅、小朋友耍功夫；比起往年o係屋企睇新聞片段，現場睇o既氣氛真係正好多～尋日雖然熱，不過我覺得辛苦少少都值得o既～

到４點幾想話走果陣，碼頭沿岸已經排緊長龍啦！好在船班都幾密，我o地等唔駛一個鐘就可以上船咯～今次有樣遺憾就係食唔到平安包．．．我又衰o既，朝早見有得賣，又唔多人時我又唔買，諗住：走時出返o黎先買啦～結果到我想買o黎食果陣，咪講話郭錦記丫，其他賣太平包o既舖頭都排o西勁長龍！都唔知要排幾耐先買到，唯有放棄啦～唔得！下次再o黎o既話一到步就即刻買先！o胡～～～

平安包綿花糖、張保仔烏賊絲

睇下老板娘笑得咁開心就知佢呢朝生意好好啦～


CAMERA師兄拍緊．．．


無線電視記者方健儀o係長洲o既報導


個個都必定會o係呢三棟包山前影相留念


我當然唔執輸啦～


球場已經砌起巨型包山，夜晚搶包山比賽就會o係呢度舉行


北帝廣場


戲棚裡面醒獅


戲棚後台


巡遊小妹妹打扮得靚靚又可愛～


大家格忌冷影番張大合照





We Are Ready～～～

其他相片: http://www.fotop.net/morlook/20080512CCBF2008