沒有父親的父親節

又到一年一度0既父親節. 今年呢個節日令我更加懷念我0既父親.

我爸爸係一個絕種好男人. 對朋友有義氣 : 朋友賭錢賭到走佬我阿爸幫佢安置佢阿媽, 朋友問阿爸借錢, 能夠俾到的我阿爸都會借.  / 對員工太仁慈 : 以前阿爸開空運公司都係小本經營, 到左1997生意好差阿爸諗住做埋貨櫃車希望多一條出路, 點知請左個賤人, 成日同我阿爸呻冇錢同個仔交學費, 一時又同我阿爸講冇錢供架貨櫃車. 我阿爸好人到為佢諗佢冇錢點會有心機開工, 所以就借錢俾佢供車, 但係個賤人轉個頭賣左架車又唔還錢俾我阿爸又唔開工. 最終我阿爸都係要執左間公司仲要賣樓套現.  / 對老婆仔女愛護到不得了 : 阿爸要搵生意要諗點同客傾返工一個人擔起一家五口已經好大壓力好煩, 但係有時阿爸放左工都仲會幫阿媽洗碗放假又會煮大餐俾我地食. 阿爸話阿媽有好多家務要做好辛苦, 其實邊有阿爸咁辛苦0Y. 到阿爸學做保險經紀, 識左個女人, 呢個女人對我阿爸有意思約我阿爸去食飯我阿爸就帶埋我地一齊出去, 等個女人知佢已經有一個好好0既家庭.  對兒女, 無論我地想買乜野只要佢能力做到0既佢都會買, 就算間公司執左之後我同細佬仲好唔生性咁叫佢買手提電話買Play Station佢都照買俾我地. 但係我地就只係請過佢飲過幾餐茶. 佢在生0既時候都冇好好咁孝順過佢關心過佢, 到佢患左肝癌都仲係掛住拍拖. 我覺得我同細佬當時真係好自私我好後悔.  呢個係我一生人最大最大, 永遠都補救唔到0既遺憾.

一個咁好0既人點解上天要對呢個好人咁殘忍, 要佢得到肝癌呢個病, 要佢捱一刀做完手術滿以為會康復能夠陪老婆仔女多幾年, 點知不到3個月再睇醫生竟然話癌細胞擴散. 要佢每日忍受乜野都唔食得, 每日被癌症折磨痛苦地等死. 到死都為家人設想唔想要我地去到"藍朗"咁遠探佢, 為左方便我地要求醫院俾佢留0係律敦治等死.

今世已經冇機會報答爸爸, 希望下一世我能夠好好報答佢