三隻待領小貓 - 哥哥、妹妹、皮蛋酥 (已被領養)

由於家中已有廿多隻貓貓, 實在不能再收留新黎既小貓, 所以決定開呢個 Blog, 替貓仔碰下運氣, 試下會唔會係網上撞到有緣人, 搵到一個幸福溫暖既家, 而我亦可以騰出多點空間, 幫助更多流浪貓貓.

第一次幫貓貓搵屋企既就係一對小兄妹, 佢地係大圍大排檔被發現, 初頭只係見到妹妹喵喵咁叫, 伸隻手摸佢, 仲識得嗲人tim, 咁純咁嗲, 九成九係被人遺棄啦! 個樣咁靚, 仲咁鬼乖豬, 點捨得唔救佢吖! 喳喳林將佢抱起放入袋, 擰轉頭就見到哥哥行出黎, 係咁喵喵喵嗌住妹妹... 哥哥好靚仔, 仲有條松鼠尾, 好長毛好特別! 呢一對共患難既小兄妹, 就係咁就黎在我屋企暫住...

而另一隻小貓叫皮蛋酥, 都係0係大排檔執到. 當日8 號風球, 我出去餵貓, 無幾耐就听到有隻貓B係咁叫... 外面橫風棋雨, 我都唔理得咁多, 救左呢個小朋友返屋企避一避先.... 睇真d 呢個B 既樣都幾特別喎! 大家睇下佢, 就知佢點解叫皮蛋酥啦... 哈哈哈

好啦, 小朋友們係時候出場啦~ 如果大家對呢三隻貓仔有興趣, 可以send email 到 mrs.yuen@yahoo.com 或留言啦!

* 大圍睇貓
** 所有貓貓都會打預防針後才給領養，會收回預防針費每針$250.00(有針咭).

*** 如已絕育既貓貓會收回絕育費(貓仔$300、貓女$500)

**** 需接受家訪

哥哥: 男仔, 4 個月, 深灰色蝴蝶紋, 四蹄踏雪, 松鼠尾
性格: 唔怕人, 活潑, 好動, 超嗲, 同妹妹感情超好 (一對領養優先)
健康狀況: 未絕育/己杜蟲


妹妹: 女仔, 4 個月, 淺灰色蝴蝶紋, 心口有白頸巾, 四蹄踏雪
性格: 唔怕人, 勁貪玩, 超嗲, 同哥哥感情超好 (一對領養優先)
健康狀況: 未絕育/己杜蟲




皮蛋酥: 女仔, 3 個月, 玳瑁色
性格: 膽小, 怕陌生人, 但親主人, 嗲豬一名
健康狀況: 未絕育/己杜蟲