2009 國慶長跑 10K

今日無乜太陽，又無落雨，Perfect！

Net time 47'39，組別第二。係一條足秤既賽道pb左，謝天謝地。

里數牌唔齊，一開始都唔知自己跑緊乜pacing，唯有依著身體感覺跑，見頂到就保持速度跑，頂唔到就收慢。



(同班猛男影下相先。)




(一到起點就遇到兩個開心果。)




(與會長在開賽前Jog了一段，迎面遇見常無私地為跑友影相的 wmhy，鐘意這張相的構圖，謝謝你。 )




(原來與新地合照了自己都不知。)



好少係比賽刻意與跑友鬥快，花少少篇幅記下過程吧。

但過程好悶下，又多字，大家無乜野就 skip 左佢啦。

---

開跑無耐就比阿海追到，呢位人兄跟左我後尾跑了K幾，我忍唔住回頭問：「你跑乜pacing？」佢答：「你既pacing！」

天啊！佢又黎呢招，跟人跑一大段，臨尾先黎界低人，死喇死喇。

3K前，阿海頂唔順我咁慢，過左我，我死跟到底。

喂喂，你又話跑我個pacing既，做乜過我？我而家又跟住你既 pacing，咁咪 loop死左？亂晒籠。




(唔好理咁多，繼續跟跟跟，你跑幾快我跑幾快。)


4K前，經過在路旁影相既 KC，阿海同 KC 告狀，大喊：「佢咬住我唔放！」即使追到死死下，我都忍唔住笑出黎。

6K後，阿海話佢無貨啦，叫我先走，我信以為真過左佢啦。但點知，佢上斜又發力過番我，哎呀！你又話無貨既，做乜仲咁好力逢人過人架！男人真係信唔過。

U turn 後落斜，阿海就好似癲左咁，越走越遠，嗚嗚，望住佢背影消閒兩個字越黎越細，追極都追唔到，心碎了。

咦，8k 後，又比我追番喎，佢叫我繼續去，咁我唔客氣啦！

最後1K幾，大鼻會長番轉頭執我，提我跨步跑，隻手唔好放咁高，已經死死下仲要顧咁多野，好辛苦呀！ 不過好彩有會長提一提，才記得臨尾都唔可以放棄，要做好啲！

衝線時虛脫咁濟。




(但好快又生猛番晒 )

---

好好好好好多謝會長咁辛苦跑完都仲黎執我，無你push下，邊殊仲有鬥志衝嗰段咁悶既最後1K！

多謝各位在賽道上相遇，大大聲給我打氣的跑友。

更多謝阿海，有你的激勵，我才有鬥心跑呢個比賽。