2008 Singapore Half Marathon 之一

順利完成，Net time 2:04:46 。



回顧

6 點半開跑，一早身都未熱就去起點再慢慢拉筋，進佔到很前的位置，起跑後跟跟下先發覺自己跟左個2hr30既pacer跑，撞鬼，即刻加速爬佢頭。

全程小腌將痛又未痛，跑得唔快，只能維持5'50/km，而且為食，受不住引誘，水站站站停，有些仲飲兩杯添，平路多，經過不少值得懷念的地方，跑得開心。




不過我無hea啦，盡左力。mental係weak啲囉，下次練長課，如果我示弱既話，各位兄弟姊妹即管鬧我啦！我唔會搏咀同示弱架啦。

感謝

首先多謝各位在賽前的祝福與鼓勵。

1. 多謝主辦單位。大會的紀錄中，我的國籍是新加坡，佢地又唔肯幫我改，令我有機會以坡妹而非港女身份跑半馬，拖低晒新加坡選手的平均時間。

2. 多謝 Chris。聽其他跑友嗌佢個名先知佢叫Chris，我同佢其實無兩句，Chris 係我這次比賽第9至17 K一齊跑的跑友，大家互有超前，後來我才發力拋離佢。好感激有佢做我 Anchor。

3. 多謝「二世」兄。唔知呢位英雄叫乜，唯有叫佢「二世」。「二世」兄係我跑最尾1.5 K時跑隔離的跑友。我最後大步跑時，剛好跑到佢身邊，結果拍住跑。

佢不斷鼓勵我跑得好，說 Good、Well Done之類，在距離終點還有三百米前，我實在支持不住放慢下來，「二世」兄好大聲叫我唔好慢，又大動作咁揮手叫我衝埋佢，我諗住唔理佢三秒後佢就應該放棄我自己衝吧，點知佢繼續堅持要我加速，我心諗，嘩，呢個真係「黃總二世」呀，咁好人既，你咁有心，為左你，我就發力同你衝埋佢。

如果我無聽錯英文，中途跑跑下「二世」兄讚我，You have good legs。咁根據當時情況，佢根本望唔到我對腳，所以意思肯定唔係讚我對腳生得靚，而係好腳骨力。無論點，佢讚一讚，我囂一囂，腳更有力去衝。


總結，一個有good legs既坡妹在新加坡半馬 PB 了。