call 車手記

慣左要有一個號碼旁身. 每次搬地方要call, 出騷搬架生又call, 就是call 貨van (客貨車).

相信好多人都有過類似經驗—— call 架車黎, 一係就溶溶爛爛, 一係靚靚仔仔但嫌三嫌四, 車裡一陣煙臭, 司機態度稍串至惡劣, 條款言明上落貨時間首15分鐘免費, 但那幾分鐘的停留卻換來不耐煩, 手車又掟到你暈……是的有遇過不錯的司機大佬, 例如 nice nice, 談得上兩句這樣. 大概五六個有一個吧.

但講到落車幫頭幫尾, 唔使旨意.

相請不如偶遇, 今日這位司機大佬是我們在迷你倉樓下的站頭碰上的, 態度非常禮貌, 我地差不多要上落廿件大大小小的, 都有出力幫手, 手車亦十分定. 最後大家因沒零錢找贖, 他主動不計較少收, 雖然有等候費, 我都寧願由我多付那點零錢, 司機搵食嘛.

大多數人 call 貨van, 真一次起兩次止, 平貴相差未必太在意, 如果規模較大並以平價吸客像 " 便 X ", 卻使得司機「賤做」或「催命」, 大家無癮.

素不相識, 純粹因為服務質素和態度, 誠意推薦俾曾經都有「不愉快經歷」的朋友 !