8 號風球

喺香港, 每年嘅風季都未必會打 8 風球, 就算打都多數係 7-8 月期間, 但今年嘅 8 號風球嚟得特別早.

噚日掛起 8 號風球嘅時候, 令我諗返起好多細個嘅野.  以前我地細個住個啲公屋, 走廊同樓梯大堂 (以前係無電梯) 係好開放, 隔離鄰舍個個都打開大門, 每個人關係都好親近, 真係遠親都不如近鄰, 但反觀而家啲鄰居, 大多數時候都係關起度門, 偶然見到面都只係打個招呼.

以前細個, 每逢打風嘅時候, 大家都好開心, 除咗唔洗返學之外, 又可以玩水. 因為以前大家屋企都係無冷氣, 夏天熱起上嚟都好辛苦, 所以每逢打風落雨, 個個細路都走晒出街玩.  我最深刻嘅..........有一次, 天文台掛起 3 號風球, 由於 3 號風球小朋友都已經唔洗返學, 但大人就仍然要返工, 所以啲細路就好似甩繩馬騮咁, 個個走晒落街, 大家玩下玩下, 原來已經掛咗 8 號風球, 當啲大人返到屋企唔見晒啲細路, 就個個落街搵仔女, 啲情景真係既搞笑又溫馨.

但時代同環境嘅改變, 莫講話隔離鄰舍, 就算父母子女啲關係都好似好疏離, 由期是電腦普及化, 人人對住部電腦,  令到社會出現好多 "電車男" "隱蔽少年", 突然間, 好掛住以前啲街坊添.