Annual Dinner

入咗呢間公司已經一年多，過兩日就會參加入職以嚟第二次Annual Dinner。

 

舊公司都有Annual Dinner，不過都係一般食吓飯、老闆講幾句說話咁，大多數無咩特別。記得上年係我第一次參加日本公司嘅Annual Dinner，事前同事已經叫我有定心理準備，不過到果晚，仍然令我好驚訝。究竟有啲咩咁驚訝呢？

 

Annual Dinner响公司樓下嘅酒店舉行，參加嘅同事有五百幾個，對於我呢個「村姑」嚟講，真係大開眼界。一開始有個同事上台舞大旗，然後社長訓話，呢啲都係公式化嘅節目。

 

晚飯以「殘廢餐」型式進行，仲未食第一道菜，同桌嘅副支店長同部長已經開始飲酒。紅酒、白酒、香檳、水果酒，全部倒入口，仲要搵埋其他同事一齊飲，我當然唔可以幸免。

 

第一道菜之後，兩位日人已經唔知去咗邊度，睇真啲原來已經同圍去，一面要人同佢對飲，一面自己大口大口咁飲。唔使一陣，似乎所有日人男同事已經四出叫人飲酒，或者响度大叫大嚷。有啲無咁好酒量嘅，已經開始醉，有啲就亂講嘢、跳舞、甚至除衫。全晚嘅高潮係一班日籍同事表演歌舞。而一班同事、包括我自己，都俾熱鬧嘅氣氛感染，跳起舞上嚟。

 

呢晚真係不可思議﹗平日响辦公室斯斯文文嘅日本人(無論男同女都係)，會飲到醉醺醺，亂講嘢，甚至除衫除褲。一啲本地男同事，平日都客客氣氣，呢晚飲咗酒，人人都癲哂，我仲被迫飲咗好多酒添。我平時唔多飲酒，酒量更加係唔見得人，只要飲啲啲就會變成關公，又會好眼瞓，呢晚我竟然飲咗兩大杯(唔好笑呀，我真係唔飲得架﹗)

 

主人成日話，出嚟社會做事，一定要識飲酒，雖然可能唔習慣，亦唔多鍾意，但都要學飲。呢一晚，除咗同事之外，老闆成晚幫我倒酒，咁我唔鍾意，無奈都飲咗一啲。

 

過咗呢晚，我對日本人又多咗一啲認識，原來佢哋誠懇敦厚嘅外表，內裡可能好豪邁，端莊嘅儀表底下，隱藏著平時唔多顯露嘅真性情。

 

過兩日就係今年嘅Annual Dinner，唔知又會發生啲咩有趣事呢？