懷孕心情(2)之…作動

預產期係二月十五號，知道左呢個日子之後，就成日諗，bb會唔會提早一日情人節出世呢，如果bb情人節出世唔好喎，個個fd掛住拍拖，咪無朋友仔得閒陪妹妹慶祝生日，如果真係情人節出世，咪收少份禮物囉…哈…我呢個亞媽，真係諗得太多喇

2月15…無動靜，16、17、18…(等到勁心急呀)直到21號朝早個肚突然赤赤地咁痛，好似m痛咁，雖然痛，但都肚餓，於是就叫亞din煮個麵做早餐先，之後就去刷牙洗面

當我除左條褲想痾尿既時候…嘩…見紅添(但聽人講，淨係見紅，有排都未生得)…於是仲繼續慢條斯理…點知洗手果陣，"卜"一聲，嘩…穿水呀…跟住即刻搵野墊住先，然後拿拿臨換衫，拎走佬袋、call的士(因為要由九龍過海生，所以每個動作都火速進行)…亞din問：太太，做咩唔食早餐咁快就出街呀？？我答：我唔係去街呀，妹妹要出黎喇，我唔食喇，你食埋佢啦……魂魄都未返黎既亞din就唯有"O"住咀咁望住我九秒九咁衝出門口

落到樓下…唔見架的士既本來諗住call左人地就等一等啦，過左兩分鐘後，同隻佬講，我唔等喇，個肚越黎越痛呀，於是，四圍搵的士，過左一陣，終於上到車，講完要去邊後，司機問：點去架？隻佬答：你行啦，我教你…

由於係返工時間，遇上最大既問題…塞車…啊…我會唔會響的士生呢？邊個幫我接生呀？？好彩，過左一陣，條車龍通番…到左醫院後，直奔入院登記處…啊…排長龍排緊隊既人雖然個個都望住我，但，無一個話俾我排先…不過算數啦，我都響醫院咯，唔驚啦…

幾經波折，醫院既人終於帶左我去產科做檢查喇，入到去問完要問既野之後，護士問：小姐，身份證丫 …  我答：唔好意思呀，等等先,響我老公度…(其實今朝我執野果陣已經發現唔見左張身份證喇，唯有帶左本護照出黎點知姑娘話，你叫你先生返去搵番張身份證呀，如果唔係就會當你唔係本地人咁收費架喇oh..之後，就有一個醫生入黎幫我檢查o勒，跟住醫生同我講，你已經開左兩度…嘩…我聽到，真係勁開心呀，檢查完仲直推我去產房添