近況

泰國機場呢排都係成日病病病，病完又病，所以都無乜心情打blog，就連去泰國五日，都可以病足三日，差d要改機票返香港，好彩臨去泰國之前因為又痾又嘔去睇過醫生，而去泰國果陣亦唔知點解會帶埋d藥過去(之前去旅行都唔會帶藥)，所以一病就即刻食藥頂住，但舅父仔就嚴重過我喇，佢要響酒店度call醫生黎，開頭佢肚痛果陣，我俾左d喇叭牌佢食(今次唔知點解會帶咁多藥)，跟住佢食左都無效，於是乎我叫佢食我果d藥，但佢唔想溝藥，所以無食到…但過左一陣，佢肚痛得好辛苦，又肚痾得好勁，於是，我地即刻響酒店call車去醫院，但點知原來酒店係有醫生，所以就只係響酒店睇醫生

個醫生一上到黎，好大陣仗，有兩個助手，一個男一個女，佢地應該係護士，拖住一個大"o急"，佢地一打開，裡面裝滿好多野，醫生幫舅父仔做左d檢查，然後就叫佢兩個助手開藥，佢兩個助手跟住就好似響實驗室咁左溝右溝，溝左一杯藥俾舅父仔飲，點知舅父仔一飲，就即刻衝入廁所嘔，但舅父仔話嘔完舒服好多喇，之後，舅母就叫我睇埋醫生，但我睇之前，就俾我食過既藥醫生睇，點知個醫生話我d藥ok，可以繼續食，咁我就無睇喇

舅父仔食左幾次醫生開既藥效用都不太大，但總算叫做好番小小，呢個醫生都收得唔平呀，都要港紙一千大元…我覺得如果係有用既都ok，但如果麻麻地的話，我就覺得好貴，不過佢都幾老實，竟然話我d藥ok而唔需要睇佢，咁又可以節省番一千大元，不過，雖然我d藥都叫做ok，但我個病情都反反覆覆，今次去到比起上一次，因為病既關係，食小左好多野喔