♥出門遇貴人 ②♥

我喺08年9月尾揾林先生揀咗單位之後, 事隔3個月, 當我收咗單位之後, 第一件事就諗起林生, 於是打電話問佢做唔做睇家宅風水, 好在佢都話成日都幫人睇. 由於剛剛1 月, 臨近新年, 佢又比較忙, 都排咗幾耐. 所以話呢, 服務有心, 都得好嘅話, 客人一定記住你, 對於講多咗又驚蝕低嘅人, 永遠都只能解簽, 收一支簽幾十元. 雖然都係講得準, 但賺到嘅錢就差好遠. 我相信同客人睇風水, 擇日等收入, 一定比解簽多.

當時我給林先生睇的, 只是草圖, 可能佢都冇諗過我會幫襯佢睇埋風水, 事隔幾個月, 睇過啲乜都未必記得, 而且一日九萬幾個客找佢, 但我一打電話比佢, 佢又記得我喎, 佢去咗間屋睇咗之後, 覺得真實單位啲風水如佢所料, 唔錯. 見佢攞住個羅更, 睇咗2 個半鐘. 佢同我講, 個單位基本上ok. 等我做好之後再詳細同你講.

跟住我又多口問佢識唔識得人同我裝修間屋. 佢又話識, 仲幫我介紹. 真係好咯, 揾好嘅裝修師傅, 真係唔容易, 我又唔識人, 實比人呃啦.

佢介紹比我嘅裝修師傅叫王先生, 好犀利, 水電, 裝修乜都識, 佢自己一錯踢都得, 唔洗外判某啲工程比外人做, 所以收得比較平. 佢唔單止陪我一齊去揀材料, 仲帶我去啲平. 靚. 正嘅地方買, 話比我知邊啲抵買, 邊啲唔抵買, 邊啲靚. 邊啲唔好睇唔好使. 兼且比咗好多專業意見比我, 間屋邊啲可以做, 邊啲可以唔洗做, 佢唔會一咪口甜舌滑, 叫你係唔係都做, 收你多啲錢. 不過我因為貪靚, 所以有啲明明可以唔洗做, 但我要加, 雖然我都要求多多, 但佢都係係噤咦收多少少就算. 其實我都有揾出面師傅夾個價, 佢個價雖然同出面差唔多, 但佢用料絶對比出面裝修公司嘅料好, 我喺同佢出去睇材料時, 有睇過其他裝修公司用嘅材料, 作過一次簡單嘅夾價, 例如出面公司多數用ICI乳膠漆油, 但佢就同我用NIPPON, NIPPON貴好多架. 亦到睇得出我用嘅材料, 比出面公司的靚好多. 絶對超值. 佢好有心, 陪我一個女人仔行咗好多次街揾材料, 攪到我都唔好意思. 皆因我要求高, 又麻煩. 材料又要特別, 又要靚. 好在皇天不負有心人, 再加上一點點運氣, 居然比我揾到好多地方都揾唔到嘅款式. 連店主都話賣咗到唔會再返貨. 由於間舖我間唔中都會經過, 見到佢哋真係賣咗之後都冇入貨, 所以都相信唔係什麼又要我買嘅銷售技巧. 最緊要的,就係價錢平.

間屋喺3月頭已裝修好, 王師傅真係快手, 又做得靚, 唔怪得之噤多豪宅都揾佢做, 又一次證明, 有心做嘅話, 一定有人知, 有人講, 生意自然來.

跟住下一步要做嘅, 就係買傢俬同電器. 不過呢排又要讀書, 又要考試, 長命功夫長命做, 而且林生話清明節冇人入伙, 所以仲有得等.