無走雞!

天氣咁鬼凍, 人懶之餘, 真係唔想掂凍水煮飯呀!  但總唔可以懶成個冬天o架!  唉.......

懶咗一日無煮飯, 昨晚又煮返, 不過因為懶, 只係整 D 好簡單嘅舊餸, 無創新.

(又係燈籠椒炒牛肉)
(都係白菜仔)

之前一篇 blog, 講到鄰居約我去 party 但又無 call back, 有下聞嘞...........

我最後無再打電話比佢, 心入面一邊諗佢會唔會搵我或打比我.  Party 7pm 開始, 7.20pm 左右, 佢大仔同二女過嚟問我去唔去 party, 我心入面有 D 開心佢哋嚟叫我啦, 答應換衫就過去.  話說鄰居話呢個係 Diva Party, Girls only, 有得食, 有得飲咁, 因佢其實今日生日, 我諗應係 birthday party, 點知去到係另一 surprise. 

去到門口, 由窗望到所有人坐定定, 都有 D 奇怪, 外國人 party 唔係咁o架嘛!  入到去...........唉!  又係層壓式推銷!  去咗唔走得, 硬坐啦!  End up 仲要見到鄰居個個 friends 都買, 我唔買又好似唔 support 咁, 始終係鄰居, 成日會見到, 唔想唔幫面阻阻嘛!  就係咁, 我又買咗 USD110.- 嘞!  好彩係呢個唔係一般層壓式推銷, 唔係個個月要買一定數嗰種, 希望以後佢唔好成日捉我去啦!  講真, 佢哋 D 嘢係靚, 不過就算話到自己幾抵, 佢哋都係比外面 above average 嘅 shop, similar 嘅貨貴囉!

至於有咩食有咩飲?  成晚派咗一件朱古力蛋糕同我開口攞咗一杯清水囉!  咁點解鄰居無覆我電話呢?  佢話佢個電話好似 reception 有問題喎!  會 missed call 同有 message 都唔知, 收唔到!  係真係假, 應係真啩?  唔想諗.

唉!  點解美國咁多層壓式推銷o架!   都唔係第一次比人捉去, 同美國其他朋友講起, 好似個個都遇過, 真係好煩囉!  我最怕呢 D 嘢, 自己唔鍾意, 但又唔識推人!  其實我唔係真係咁討厭呢次層壓式 meeting, 起碼佢哋未有 push 我買嘢, 係我自己怕唔好意思而買.  但係鄰居叫呢個為 Diva party, 一班朋友聚埋 have fun, 我有 D 被騙嘅感覺囉!  其實佢照直講嚟邀請我, 我都一樣會因唔好意思而出現o架!  起碼覺得自己係知o架嘛!  唉......

好奇怪, 聽收音機講, 今日係全球廁所日, 咁即係點呀?