Negative

昨晚聽 blog 友 Phoebe 講, 用暖包 warm 住隻腳個腫位, 但整足一晚都無起色; 為下星期要去玩, 為咗唔想到時因腳痛問題玩得唔開心, 今日 Hubby 都係帶我去睇醫生.  呢個醫生算係我喺美國睇咁多個醫生嚟講, 比較好嘅一個, 起碼唔會見你2分鐘就掃你出門口, 我問其他嘢, 佢幫唔到都會慢慢解釋清楚!  不過同樣哋, 都係諗個辦法呃錢啦!  佢話我膝頭關節似磨損咗, 但又可能唔係, 總之請我去照 X 光, 又過幾日去攞片先比藥.  嗰刻我一頭霧水, 照做啦!  出到門口 Hubby 先話 R 晒頭, 點解係 X 光唔係 ultrasound?  Ultrasound 先睇到 D muscle 啊!  哈!  頭先又唔問醫生, 你問我鬼知咩!

醫生仲話我成日著涼鞋, 會因腳掌無承托力, 令我膝頭受力更多, 更傷, 我最好著返 D 波鞋, 等有 D cushion 卸吓力.  吓!?  唔係呀嘛!?  唔可以著涼鞋!?  夏天好焗o架喎!  不過無辦法啦!  鬼叫自己對腳咁咩!  於是我呢個一年都著唔到5次波鞋嘅人, 就去咗 Lady Foot Locker 買咗我人生第一對 Nike Air Pegasus, 再加對好 D 嘅墊啦!  "連稅多謝你一百一十五美金吖!"  唉!  用百幾蚊買咗對我呢個矮人著咗, 圓圓鈍鈍, 侏儒咁嘅波鞋, 睇住自己著住, 一 D 都無型嘅感覺, 真係慘!

買完嘢, 攞埋藥, 攪咗一輪, 終於諗煮飯.  呢排時間又係好亂, 好耐無煮飯咁, 一於試我人生第一魚, 煎咗我早幾日雪咗嘅"魚倉"魚啦!  由細到大見老豆煎親魚都爛晒散晒, 所以煮之前我都已問過 Phoebe 同 Candy 有咩秘技煎魚, Phoebe 同 Candy 都話用我嗰隻 marble wok 就應該 OK.  今晚煮時都係驚, 又驚燶, 又驚唔熟.  我都聽講過煎魚唔可以太快郁佢, 唔係好易散.  我都已隔咗一段時間先郁佢, end up 係點!?  D 皮甩咗7成喺個鑊鏟度囉!  仲要煎到 D 鰭甩晒, 連魚尾都比我唔知點解煎到一分為二!  加埋之前買魚時, 因怕 Hubby 見到會驚, 而叫魚販"去埋個頭", 成條魚就不知所謂, 一堆嘢咁!  加上明明條魚應已熟, 又都驚驚哋, 再入微波爐叮一陣, 終於成條魚9唔搭8一埋嘢咁上枱, 真係超核突!  Hubby 好開心呀!  因為一向唔鍾意魚皮, 覺得唔乾淨又核突嘛, 而家唔駛擔心嘞!  甩晒!  我諗煎魚可以煎到咁, 都得我可以嘞!

(我已經選過, 呢個角度叫無咁核突, 我先咁 post 上嚟咋!)

好彩之前買落通菜竟然仍新鮮, 雖然個樣核核突突, 但好爽趣好正啊!  總叫補返吓條魚嘅不足!

仲有之前喺食肆買嘅雞, 總叫有 D 好味 D 嘅肉食吓!  但要斬呢隻嘢都幾辛苦!  攞把大菜刀, 斬到手掌都瘀埋!  早知嗰時叫賣雞人幫我斬埋啦!

嘩!  好攰!  要快 D 執碗洗碗, 整埋 D 嘢先!  Hubby 話我哋明早一早出去, 去"玩食沙" (motorcross) 呀!  都係早 D 瞓好!