1986的故事

1986年, 我升中一, 第一次聽到玫瑰的故事, 一套依據亦舒小說拍成嘅電影.  作為一個初中生, 父母又咁嚴, 當年我邊敢叫父母帶我去睇呢套戲?  之後每隔幾年就聽到電視台重播, 講到尾當年係大片, 又係大星, 周潤發 + 張曼玉, 梗係重播又重播啦!  不過我已無咩興趣啊!  咁舊嘅戲, "leung" 唔 "leung" D 呀!  End up, 一直都無睇過呢套戲.

事隔23年(嘩!  突然覺得自己好老!), 今日喺華語電視見到"又"重播, 本來有一刻衝動, 想即刻轉台, 但係又諗, 雖然呢套戲已經超超超超超舊, D 演員衫同打扮都勁 outdated, 不過呢套都叫大片, 我又未睇過, 不如睇吓啦!  就係咁, 我睇晒成套玫瑰的故事.

年紀輕, 未睇過呢套戲嘅 blog 友們, 套戲係講又年輕又靚嘅玫瑰, 由細到大由哥哥照顧同有 D 過份寵愛, 佢亦好愛哥哥.  同時因玫瑰好靚, 有好多男仔追, 佢一直同唔同男仔拍吓散拖, D 男仔真係比玫瑰點到暈.  但玫瑰可以操控咁多男仔心嘅同時, 佢反而係選咗一個已有未婚妻嘅男人.  等玫瑰以為自己會同呢個男仔有好結果時, 呢個男仔選擇同未婚妻結婚, 玫瑰一怒出走, 去咗巴黎讀書, 都勁傷亞哥心.  喺巴黎同自己唔鍾意嘅男同學結婚生仔, 一直唔開心咁過咗好多年, 直到哥哥 cancer C 咗, 佢亦離婚帶埋個女返香港.  就喺香港, 玫瑰遇返之前唔要佢嗰個男仔, 同時又遇到同佢哥哥勁似樣嘅家明, 終於玫瑰選擇同家明一齊.  以為故事有好結果, 玫瑰家明可以結婚時, 點知家明又遇意外 C 咗, 玫瑰又得返一個人嘞.

雖然有 D 懷疑玫瑰, 其實一直係愛上自己亞哥, 唔多接受呢個 concept, 但成個故仔真係好 sad, 都睇得我心好 "up", 好觸動人心.  以為玫瑰會有好日子過, 替佢釋懷, 點知又有個咁嘅結果.  不過真係唔講得笑, 一直以為呢套戲會好 "leung", 但竟然有 surprise; 唔覺得 "leung" 之餘結局仲幾出人意表!  雖然鏡頭明顯遮遮掩掩, 竟然仲有床上戲!  個 impact 都幾深啊~  亦舒果然好犀利, 寫小說都幾創新(對當時而言嘛!), 我諗當時一定好大 noise 啫!  當然仲有得睇返咁"嫩口"嘅周潤發同張曼玉, 當年周潤發又真係幾靚仔啊!  唔怪得咁多 fans!  張最玉都好春青無敵啫!  但佢仍可以由十幾歲天真活潑, 做到三十幾女人味濃, 真係好犀利!

真係好彩我睇返呢套戲咋, 唔係真係一個損失啊!