通常我都將日常事情寫在xanga, 作品就集在於此.
但呢次既日常事情, 我覺得係重要.
===============================================
近來既xanga都星期化咁寫出.
事實上係冇咩野好寫.
但今次我好急不及待想寫xanga抒發一下.
星期五下晝返完IVE open day之後, 我就直接去觀塘新居.
之前幾星期都分批搬晒我d設備去果邊.
包括PC, Printer, 擴音機, 喇叭, PS3, 結他, AMP.
可以話將我D手手腳腳都放晒o係果度.
雖然我預期唔係完全搬去觀塘住, 而係兩邊住.
但我之所以咁大決心去搬.
因為我發現o係樂富舊居既婆婆開始冇乜智商做正常既行為.
不但煩憂我做功課, 而且又唔注重環境衛生.
縱使我想照顧佢, 但實在好辛苦.
我一直想有自己既房間, 可以冇人干擾,做自己野.
因為一直同呀媽上下格床一間房.
當我砌模型定做功課都會比佢行出行入干擾到.
而電腦又o係客廳, 畫得圖又用唔到電腦, 有d麻煩.
============================================
由星期五下晝去到e+星期日晚上7點左右
我一個人o係觀塘新居渡過.
打機, 睇片, 玩結他, 做功課, 樣樣野都好方便.
因為我有自己既area.
而食方面, 9點幾去吉之島買d特價野返去落鑊兜兜都叫搞得掂.
理論上, 我可以處理到日常需要.
應該可以適應.
但
冇家既感覺
一個人o係間屋度.
身邊冇左由朝煩到晚既電視機聲.
冇左唔合邏輯既婆婆問句.
冇左零亂既雜物圍繞自己.
冇左我所熟悉既物件.
感覺好不安.
呢3日既獨居, 令我明白咩叫"家"既感覺.
冇家人既地方, 不可能叫做 "屋企".
去到預定會返樂富既今日.
我下晝既時間非常喘不過氣.
好想好想好想好想好想好想好想好想好想返 "屋企".
返到屋企之後, 我覺得好似迷路荒山搵返出路咁.
內心有一種感動, 感動到想喊出黎.
心裡好想大聲同婆婆講 "我好掛住你呀!"
好想上前大力攬住佢.
(當然...沒有做到..)
可能我未習慣果邊既生活, 或者我唔夠獨立.
但呢3日, 令我知道咩叫家庭溫暖.
我可以想像終有一日婆婆會離開我.
但一直想像唔到我會有咩感覺, 我諗呢3日, 我可以確定.
我一定會喊個不停.
因為打呢篇xanga, 我的眼淚已經蠢蠢欲動.
