決戰大漁

由10月中延期至10月尾，期待已久的深圳放題‧‧‧難得同熹媽兩家人北上盡情擦餐勁，更難得既就係大家都冇帶兩個寶貝小豬嘜出黎，突然回復自由身，果種感覺真係.......... 食多幾次肥多幾磅都低啦！

大漁出名在食物新鮮唔在講，即叫即煮(係你面前煮)種類都算O.K.多。  唔知係咪因為星期六，今晚真係好多人，好在4日前book左間房咋，如果walk in真係無可能有位架。  服務員忙過不停，上菜上得好慢呀，我諗最主要係唔夠人手啦，不過請大家放心，我地個個都可以回到本架~~~~ Yeah！

有d就食左都唔記得影相既例如：一直好期待品嘗到既和牛(唔知係成本貴定其它原因，落左好多次單都係黎得一次咋，鐵板燒至7成熟，d汁調教得好好，幾好味架)仲有鰻魚、花姿片、牛仔骨等等都係唔錯既選擇。  藍ba飲左5杯梅酒呀，計佢$20杯都已經$100啦，如果我地去多幾次大漁會唔會比我地搞到執笠架？

先黎每人1個雜錦刺身(先後落左4次order，he~~~he~~~ 都唔係好多啫)

鵝肝沙律

都唔平既羊架(d汁整得唔夠香遮蓋唔到d羊"so"味)

扇貝就燒得幾香口

虎蝦 + 燒豪

椒鹽魷魚鬚

鎮店之寶鐵板蒸蛋呀(好正！！ d蛋滑到......... 同藍藍豬塊面有得揮囉)

芝士蝦 + 青口(d芝士好香呀)

魷魚圈

傳說中的頂級鵝肝(都算幾好味，真係有入口即溶既感覺)

右邊果碟係牛，左邊果碟唔記得左係咩？

紅豆雪糕

飲酒後既熹媽份外性感呢！