安安覆診記

安安喺大概一週前又試腳仔疼, 唔願郁, 終日沒精打采兼扭計.....唉 ~ 久病成医...唔駛睇医生都知係作緊「舊病復發」啦  。 同Dr. Tong商量過後, 連隨加大咗30% 平時daily intake嘅類固醇,  仲約咗Dr. Tong, 趁安安喺呢個罕有嘅空檔: 冇便血, 冇嘔, 只係爛肉 (又生多撻啦).....Fri.去驗血, 以確定可否盡快轉新药.....因為大家都覺得安安呢輪咁多「林審」嘢, 係因為 1) 類固醇啲side effects出啦....or 2) 安安嘅自体免疫病再勁咗, 用同劑量嘅類固醇己經控制唔到。

一週下來安安關節疼冇改善, 雖然亦冇惡化 (僵硬蔓延至全身+發燒).....但好明顯睇得出安安成個礼拜都係頗唔舒服嘅。後來諗番起吳医生以前話過: 一旦安安「舊病復發」, 類固醇要double分量at least十日, 先可以得住.......我哋鬥爭咗一陣, 決定先斬後奏, 兵行險着(因為突然double 類固醇intake, 唔知會唔會觸發啲便血呀, 嘔吐呀....搞到又一排唔驗得血), 但見安安咁唔舒服.....

類固醇真係一樣令人又愛又恨嘅嘢~~~~~愛佢嘅神奇功效 (安安食咗double分量一天, 由唔肯郁, 变到對BaBa行一步跟一步, 自己跳上矮櫈); 恨佢對身体內臟做成長期致命嘅傷害.....

Fri.去到見Dr. Tong時, Dr. Tong都有點想微言我哋double药俾安安, 但睇到安安精靈活潑, 完全睇唔到佢幾日前仲係一隻週身骨疼呻吟嘅小狗, 佢最後都

安安嘅各項指數同Dr. Tong預期嘅差唔多:

1.  貧血 (類固醇壓抑咗做血功能)

2.  白血球超多, 因長期各類發炎進行中

3.  肝指數可接受

~~~~即係話可以試新药啦!

我哋眼見安安啲爛肉唔多好, 仲生多咗, 諗淨係早晚消毒可能唔夠, 於是向Dr. Tong提出種菌, 好check吓可以配啲咩药膏俾佢搽 (因為安安對好多药膏已經抗药)....要兩週後先有結果。

安安身經百戰, 兩個月大己試過因腸病毒留院5日, 日日喺頸上嘅大動脈抽血驗白血球.....以八個月大之稚齡已照過X光, 抽過腦骨髓, 關節水.......本來天不怕地不怕嘅安安, 隨着越大越弱, 加上latest在荃灣陳医生clinic的可怕抽血經驗 (姑娘捉唔實安安手仔, 抽咗3次先抽到, 傷口大流血) , 安安好抗拒抽血!  MaMa向Dr. Tong提出用食物可氹到安安分散注意力, 於是大家夾手夾腳, 抽血順利完成!.....呢包sample糧亦順理成章送埋俾安安啦!  安安呢個儍囡咁就歡天喜地, 完全唔關心人哋喺佢3隻腳仔度抽血啦.....

一大堆药...... (洗傷口药水+大針筒for flushing、皮膚酵素、皮膚抗生素、新药+類固醇打孖吃、護腸奶)

呢兩年阿安冇時停.....忽略咗BB, 原來兩年冇打過混合針啦, 順便做埋!

今日張單好「金」.......另呢兩週要密切留意安安服新药後, 有冇不良反應。