我個仔好叻！

話說有一次，有個主人喺我嘅新蒲點同佢隻大狗遠遠咁互相對望，彼此郁都唔郁。大辣自己有隻拉布拉多大狗，所以好熟行咁話比我知，個主人正在訓練緊隻狗，冇佢命令就算主人走開都唔准郁！

咿？咁？哦？唔？不如我哋都試吓啦！本來只係抱住玩玩吓嘅態度，連大辣嘅回應都係："你就想啦！" 點知唔試尤自可，一試馬上就得咗，唔駛 Take Two！呢個寶貝仔真係好神奇！

唔係賣花讚花香，我真係覺得個仔好叻！人哋唔知就以為我訓練有素，其實係寶貝仔喺冇人教佢嘅情形下，自動自發咁做出嚟。只係事後我把握機會，得閒就去補吓飛，確保 Ja B 唔會唔記得。但睇到咁情形嘅過路人，都以為我好叻，教到個仔又醒目又聽話。其實聽話係佢嘅本性，醒目亦係佢嘅本質，我呢個亞媽真係執到寶啦！