我們相愛六年

Edmonton時間2008年2月8日星期五大年初二1：22am

今日，大年初二。喺2002年春節大年初二嗰日，我同敏敏相識。我哋第三次見面就確定關係一齊喇。估唔到，一段開始得咁兒嬉嘅感情，可以持續到六年咁耐，而且仲會一直繼續落去。

喺呢六年裡面，我哋經歷過好多開心同唔開心嘅事。發生喺我哋之間嘅每一件事都係咁重要，都見證咗我哋嘅成長。

2002年3月，有一晚，我同敏敏淩晨3點突然想去南華寺拜神，結果第二朝7點，我哋就坐上去韶關嘅火車喇。嗰次，就係我同敏敏嘅第一次旅行。

2002年世界盃，敏敏輸咗好多錢。我借咗差唔多兩萬俾敏敏還賭債。直到2007年11月先還清。

2002年，我21歲生日。我哋去上下九綠茵閣食晚飯。敏敏送咗一隻金戒指俾我做生日禮物。呢只金戒指係我最中意嘅戒指，直到而家我都一直戴住。同年，敏敏24歲生日，我哋去咗泰康路幸運樓食飯，我送咗對皮鞋俾敏敏。不過敏敏著一年就爛咗喇。第二年買鞋嘅時候，傻瓜敏敏竟然仲想買翻同一牌子嘅鞋。好彩有我嘅提醒，先唔至於犯同一錯誤。

2002年尾，敏敏首先係拉傷只腳，跟住開摩托一日之內撞兩次車。敏敏第一次喺我屋企住咗十幾日咁長。嗰段時間，我每日除咗翻學仲要扶敏敏落對面醫院睇病。天寒地凍每日煮飯。呢段日子真係艱苦。

2002年尾，敏敏激嬲我。竟然好豪咁即刻送一隻鉑金嘅PT900俾我氹翻我。

2003年春節，大年初二，敏敏去咗佢阿婆屋企。我記得當日落雨，氣溫係2℃，我一個人喺屋企。晚飯係我自己落街去士多買嘅一袋餅乾。當時仲不斷重聽再重聽千樺嘅《Miriam's Music Box》。

2003年初，敏敏失業，喺佢屋企嗰邊欠落一筆賭債，開始喺我屋企住落嚟，直到我走。嗰段時間，我每個月就係靠媽媽600蚊嘅退休金生活。除咗我同敏敏食飯，仲有一個月250嘅房租、水電煤氣。我每日限定只用10蚊買菜買煙。我喺學校裡面乜嘢都唔捨得買，中午只係食一個個半嘅麵包做中午飯。日子雖然過得艱苦，不過總算開心。愛情同麵包，我選擇嘅係愛情。

2003年暑假，敏敏同我輸賭。佢為咗要我同佢松骨，自己做“升降機”做到只腳發炎就去打針。其實，敏敏都好細路嘎。

2003年7月，爺爺爆血管入醫院。嗰段時間，我一方面要嗰日去醫院過夜照顧爺爺，一方面要面對“白鴿姑”嘅冷嘲熱諷同埋屈人神功，我心情好down，好彩有敏敏支持住我。嗰段時間我冇點陪過敏敏，令敏敏惹上咗一班打麻將嘅八婆。9月，爺爺最終離開咗我哋。我開始覺得我對爺爺嫲嫲嘅關心唔夠，後悔到而家。我從嗰陣開始，我講過，我一定要將最好嘅俾曬爸爸媽媽同埋嫲嫲。

之後，敏敏為咗打麻將，講咗好多大話呃我。甚至俾我拆穿仲要死撐唔認。我同敏敏嘈咗相識以嚟最大嘅一場交。結果，係我敗陣。嗰陣，我開始明白到，有道理唔係大曬，邊個愛得深邊個就係輸家。從嗰件事開始，我對敏敏嘅說話唔會再盲目相信。呢件事對我打擊好大，令我一諗起就覺得敏敏喺度當我係傻仔，用埋曬啲低級謊言嚟呃我。

2004年4月，嫲嫲喺屋企暈咗。當日，就係我同吳心琛、阿漂、敏敏一齊送嫲嫲入醫院。當晚，我仲同敏敏一齊飛摩托去農林下路同仁堂買安宮牛黃丸俾嫲嫲。好好運，嫲嫲好快就好翻出院，係我哋同嫲嫲一齊努力嘅成果吖！

2004年，我畢業喇。畢業禮上面，我冇任何親戚到場，不過我有敏敏。佢同我哋一齊影相一齊玩一齊癲。喺中國學校生涯裡面最後嘅一段時間，敏敏陪我一齊渡過。

2004年8月，我畢業後只係做咗一個月嘢就失業喇。唯有喺屋企一邊讀英文準備出國嘅事一邊做敏敏嘅煮飯婆囖。

2004年10月，敏敏入咗聯通做嘢。佢公司有活動，敏敏都帶埋我去玩嘎。敏敏喺聯通做得比較好，我哋嘅生活開始寬裕起身。敏敏負責咗水電同網費，我買菜當然就係越嚟越大方喇。由於得閒，煮菜嘅花款越嚟越多，咁敏敏食飯先唔會咁悶嘛。而且從嗰陣開始，我哋可以每個星期出去食一餐飯，同埋買一啲零食翻屋企。

2004年12月，敏敏第一次月入幾萬。我哋好開心咁去shopping。

2005年春節，敏敏以前女朋友揾佢，敏敏仲要瞞住我。最後俾我拆穿咗。女人係小器，我承認。嗰個女人一直喺我心裡面就係有條刺，所以我憎佢恨佢詛咒佢。我唔理佢哋之間喺嗰段時間有冇發生過乜嘢（當然我相信敏敏），我就係唔想佢哋之間再有交集。嗰年春節，我病咗，我喊咗。嗰個春節，喺我最痛苦嘅春節。一直到佢哋唔再聯絡，我先慢慢開心翻。

2005年8月，敏敏喺426開咗一個卡同我搞生日。可惜到我准點生日嘅時候，敏敏要送佢一個“人出酒佢出命”嘅醉酒朋友翻屋企唔可以同我一齊渡過。不過，我覺得呢個生日過得好豪。

2005年9月，我同敏敏同埋我班best friends一齊去清遠漂流。係我第一次玩漂流吖！我仲俾上面沖落嚟只船壓咗落船底，好彩敏敏拉翻我出嚟。

2006年情人節，敏敏同老吳去咗香港，買咗一對情侶鑽戒做我哋嘅情人節禮物。恨死隔離嗰個。好sweet吖！

2006年世界盃，敏敏又開始瘋狂賭錢。開始時候我哋仲訂下咗戒賭協議，不過敏敏好快就冇遵守，結果協議不了了之。戒賭失敗。

2006年8月，我開始喺華聯做嘢。我生日去咗食韓國自助餐。過完生日第二日就要加班喇。嗰段時間經常加班，冇得陪敏敏，搞到我好唔開心。

2007年情人節之前，有一晚，敏敏同朋友出去蒲，其中一個仲要係我好憎嘅人。佢唔肯帶我去，為咗俾我一個解釋，講咗好多大話去完美呢個解釋。我好嬲。當晚我就去咗賓館瞓，第日朝早翻屋企同敏敏嘈交嘈到翻工遲到。嗰次我真係好嬲，我覺得我喺敏敏心目中係一個負累，為咗佢啲豬朋狗友咁嚟對我！

2007年情人節，我送咗一條綠幽靈水晶鏈俾敏敏做情人節禮物。Sales姐姐話綠幽靈會帶俾人橫財運嘎，不過，敏敏都唔帶我條鏈。我諗而家敏敏都唔記得咗我放咗去邊囖。其實就收埋喺我只玩具鯊魚嘅咀裡面。

2007年春節前夕，我同敏敏去咗香港，為就嚟移民去New York嘅三姨餞行。去完香港翻嚟，我病得好緊要，一直咳，咳到正月過咗先好。

2007年4月，媽媽要做換心瓣嘅手術。我乜嘢都幫唔到，只係可以喺屋企喊同祈禱。好彩，敏敏一直喺我身邊撐住我，我先唔至於崩潰。幸運嘅係，媽媽手術好成功，恢復得好快。多謝每一個幫過我媽媽嘅人。

2007年8月，嫲嫲翻嚟，我要去嫲嫲屋企瞓。敏敏趁呢段時間去咗澳門賭錢，仲要關機。因為當時我用咗敏敏其中一個手機num登記咗做啲嘢，隨時準備人哋會打電話過嚟check。點知敏敏為咗賭錢乜嘢都唔理。令到我對佢好失望。佢賭咗三日三夜先翻嚟。我本應好嬲佢，但係唔知點解見到佢之後我又嬲唔落喎。

2007年8月，敏敏接我放工經過中山五路俾賊搶頸鏈，追賊嘅時候仲俾賊捅咗patpat一刀。我又心痛又驚咁送敏敏入醫院，一路陪住敏敏。

2007年9月，我知道我已經攞到去加拿大讀書嘅簽證喇。呢個簽證我盼咗兩年喇，攞到嘅時候我竟然一啲都高興唔起身。我唔捨得敏敏，唔捨得嫲嫲。其實，嗰陣我已經暗地喊過好多次嘎喇。

2007年10月，國慶日假期，我同敏敏重臨南華寺。

2007年中秋，敏敏買咗一個keroro嘅紙燈籠俾我玩，氹得我好開心吖！其實禮物唔需要貴嘅，有心就一個紙燈籠咁小就已經足夠喇。

2007年12月，我要走喇。我好唔捨得敏敏，最後嗰大半個月嘅時間裡面，我經常對住敏敏喊。我好驚我走咗之後唔知會點。只可惜，喺我臨走嗰一個禮拜，敏敏都冇兌現到佢之前嘅承諾——每日乜嘢都唔做淨係陪住我。不過，我冇怪過敏敏，工作要緊嘛。最後一日，我知道敏敏中意食我整嘅排骨，我專登去市場買咗幾斤排骨，一路喊一路做咗五份敏敏最中意食嘅蒜頭豆豉蒸排骨放喺冰箱。直到而家，敏敏仲有一份存貨喺冰箱裡面嘎。當晚，我同敏敏兩個人攬住一齊喊，當時，我好清楚，我真係好愛好愛呢個男人。

2007年12月28日，我哋5點幾就起身去海珠廣場坐車落香港上機。喺機場，我喊咗好多次，我好唔捨得敏敏吖！

2008年1月，敏敏去咗澳門豪賭，輸咗廿幾萬。而且仲俾我知道原來當日佢送完我上機就即刻去咗澳門賭錢喇。我冇諗過敏敏點樣還呢筆錢，亦都冇諗過點樣喺錢銀上幫佢（雖然我已經借咗一萬蚊俾佢喇）。或者外人睇我覺得我鐵石心腸，但係我知道唔狠心嘅話，敏敏始終唔知“死”字點樣寫。我之所以狠心，係因為我比其他人理智，唔想好心做壞事。敏敏話佢會改，其實我係唔信嘎。點都好喇，時間會證明。

喺第七年來臨之際，我孤身一人去咗Edmonton為我哋嘅將來而努力。我預料唔到我哋將來會係點，亦都唔知要等幾耐先會有我哋嘅將來，不過我會一直好努力好努力。只係我一個人努力係唔夠嘎，我要敏敏同我一齊努力先得。以前，無論敏敏做錯乜嘢，人哋點樣講佢，我蒙住對眼全部都同佢擋曬。但係今日，我已經再冇能力喺敏敏身邊為佢去擋子彈喇，一切都要靠敏敏努力去做好自己，得到全世界嘅認同。

曾經有一段時間，我好怕我哋嘅關係會由於距離而發生變化。臨走嗰陣，我已經諗通喇。嚟Edmonton呢個係我個人嘅決定，敏敏雖然唔捨得我，但係都盡心盡力去幫我（我好感動敏敏咁嚟為我）。六年以嚟，敏敏一直喺度遷就我寵我照顧我（雖然有時都會激我），我先至從一個乜嘢都唔識嘅傻瓜長大成而家咁。我要相信敏敏，佢其實一直都喺度守護住我嘎。即使以後我哋嘅關係有乜嘢變化，敏敏永遠都會係我最親嘅親人。