天然骨膠原－花生炆豬手雞腳

補充天然的骨膠原，最好就係食落肚啦！！！尋晚我就整咗個花生炆豬手雞腳今晚做餸！

材料：急凍豬手一磅，雞腳半磅，花生，薑，蔥，蔥頭少許

做法：１）洗淨材料，燒開水，將幾片薑同少許蔥段放入滾水中將豬手雞腳汆出，撈起

２）下少許油，將薑及蔥放入，與已汆水之豬手雞腳下鑊略爆，贊少許酒

３）再下少許胡椒粉，半茶匙鹽，少許豉油及老抽（用以整色整水）及半粒冰糖，再加少許水至煮滾

４）轉回瓦煲中，其間不時看火及翻動以防黏煲底，水不夠時再在煲邊逐少加入，炆１個半至２小時即成

其實只要平時均衡飲食，多菜少肉又有運動（不過我自己都冇）偶一而為之大快朵頤食呢ｄ豬手雞腳又何妨？