飲食記趣~~公和

今次又係深水埗,其實搬離深水埗都已經很多年,但是童年記憶就是如此深深影響着一個人,尤其是一些美食,真係諗起都會流口水,當然今時今日深水埗已經很不同了,兒時的美食也許已經消失得無影無踪,但我還是會偶爾回到那裡走一趟,,吃吃還存在的童年美食,也嘗嘗一些新開的食肆,看看有沒有一些開心大發現~~~

這次是位於北河街街巿入面的公和荳品厰,雖說是厰,但其實都只是一間鋪頭而已.地點位於街巿入面,仲係舊式街巿嗰隻,即係會混雜咗好多氣味,而地下仲係濕轆轆,都幾多垃圾嗰隻,所以有潔癖者自己諗清楚先好去,不過公和入面呢??就好乾淨同只有豆香味絕對冇臭味嘅,所以都唔駛太擔心食物嘅衛生情況或驚會影響食慾>>>

嗰度我咩都鍾意食,雖然每次都係諗住食少少滿足一下或飲杯豆漿便算了,但最終總又是會忍不住通通都要點晒,幸好今次有友人同行,所以可以有人分擔一下>>>

雖然我樣樣都鍾意食,之但係人總係會有啲貪新厭舊嘅心態,以前最鍾意食豆腐花,之後就變咗係煎釀豆腐,而家就係前釀豆卜,大家睇吓上圖,我係叫多一碟豆卜架,哈哈,我係咪好大食呢???其實我諗.....我嘅最愛始終都係豆漿,因為無論我食咩或幾飽都好,都一定要叫杯豆漿!>>>

臨走時我仲要多串豆卜走汁即時食同埋一支大豆漿外賣.....都話咗我大食架啦,不過可能係有少少心理補償嘅關係,點解??因為嗰日係我終於整好隻牙啱啱裝上牙套之後,再專誠一路由長沙灣行落去深水埗食嘅,之前個幾兩個月冇啖好食,嗰日要一次補償返晒,呵呵呵>>>

後記:雖然好多電視美食節目成日都有介紹九龍城嗰間老字號嘅豆腐花好好食,連阿蘇都有介紹過,而我自己亦老在各界介紹前都親身去食過,不過我就覺得好一般,豆腐花冇錯係好滑,不過比較起上嚟就欠缺咗啲豆香,個人覺得連尖沙咀厚褔街嗰間唯一都好食又有豆味過佢,要整得啲豆腐花滑唔算最難,最難係滑得嚟仍然有豆香,須知過濾多幾次就自然會滑,但同時亦會散失豆香,所以識得揀豆都係好重要!!

PS:除咗深水埗嗰間公和之外,其他嗰啲....都係算罷啦!