煩

好耐無update個blog, 因為真係好忙, 放假有時間, 但係又無電腦用.

今日囡囡又話唔舒服無返到學, 上個星期又返得半日............其實由舊年9月開始問題一直都解決唔到, 佢學校既社工建議帶佢去睇心理醫生, 但係每次收費要成600蚊, 呢家野唔係話睇一次半次就可以解決架麻, 我地呢d單親家庭邊度負擔得起呀!

即使做個心理評估都要成4000蚊, 咁評估完之後又點呢? 係咪評估完就唔使再睇? 再睇又係一個無底深潭. 佢daddy又無俾錢, 佢話無野做喎, 耐得佢何咩!

學校老師又打黎, 一味話唔可以俾佢咁架, 你試下迫佢喇! 其實軟硬我都試過, 但係都係唔得! 可能係我太心軟, 見佢真係嘔得出, 又見佢痛到話行唔到, 我又點知今次係真定係假呢? 如果迫到佢返學, 到佢真係上上下堂頂唔順, 我又邊到可以放低工作去湊佢返黎呢? 明白老師都有壓力, 因為佢話佢地呢班係A班, 打算一路谷到佢地6年班升上band 1中學, 囡囡咁樣會影響左好多同學既學習, 但係我都唔想, 我其實一直都好唔開心, 每一日都諗佢會唔會唔返學, 佢聽日又會唔會唔舒服? 係真定係假? 如果我勉強佢, 萬一佢真係唔舒服, 有咩事, 點算? 我真係好想話俾所有人知, 我有努力叫佢返學架, 我唔係無心裝載架! 而家呢個情況, 每日都困擾住我, 再加上囝囝既情緒問題, 我每晚都失眠, 出街同埋工作都神不守舍, 好多時都忘記自己要做既野, 或者要買既野.

同事聽到我同老師一邊講電話一邊喊, 事後都安慰我話明白為左小朋友係會好煩, 但係點都幸福過地震既災民..............我知! 我明! 但係d事殺到埋身又另當別論麻!

唉~ 如果可以我真係連工都唔想返!

好XXXXXXXXXXXXXXXXXXXXXXXXX煩呀!!!!