模型船 2

某日，BIBI同我講話唔想學柳琴，我就話好；不過要改為去補習英文同數學。佢即時收聲。當然又俾我訓示一輪。

今日同BIBI去完圖書館，大小姐話要行下街街先，我當然無得反抗咁陪佢去。响商場入面見到個著住"賓尼"兔上衫連有耳帽、下身著灰色長襪褲人嘅背影，佢仲"的"起對兔耳添。咁鬼cute嘅 ??

行完一轉，迎面再見到"兔女郎"，BIBI同我講: 點解咁多人會擰轉頭望佢嘅?

你睇唔到呀 ? Cute嘛，仲有係男人嚟架! BIBI當堂O哂咀，"著襪褲喎?" 咁就一定係女咩? 傻女。你要唔要望真啲，不過要應承我，面部唔可以有任何表情；得唔得 ? 驚喎 ! 有乜好驚，你亞媽响度。

BIBI卒之睇真啲，我又睇真啲BIBI個樣，淨係識得E起棚牙。有乜問題?雖然"兔女郎"嘅精神狀態有異，不過佢自得其樂，又無傷害到人咪得囉。

既然大小姐又話想睇人放模型船，我當然又奉陪啦!

我見到啲叔叔咁專注於佢哋啲模型船，每星期都會聚集一齊玩，而每次落船都係2、3分鐘，就要扲番上岸，我都忍唔住咁請教啲叔叔。淨係兩架船都差唔多一部手拉車連旅行喼啲裝備，電池、馬打、螺旋槳.....一大堆，玩得好專業。

我又點錯過BIBI送俾我教訓佢嘅機會喎 !即場表演俾佢睇， 做任何事都要有恆心、耐性同投入；固然興趣最重要，柳琴學咗三、四年，又彈奏得OK，點解唔學 ? 如果俾到一個理由我，我就唔會堅持。只不過係"懶"唔想練琴，就咁簡單。咁易放棄，將來做乜都會唔掂。我從來都唔會太強迫BIBI，今次我就好堅持要佢繼續學。BIBI亦都無言以對，唯有唔順氣咁乖乖就範。亞女，將來我哋可能可以响公園度表演呢!你彈柳琴、我唱歌，有機架，唔該，俾個機會你亞媽啦!

BIBI既然肯就我，我又帶佢去睇人餵魚。唔知點解，我好怕見到一大堆魚湧埋一齊搶魚糧/麵包嘅場面，對我嚟講好唔舒服。亦正如我一到人多地方，就會有透唔到氣嘅感覺。心理問題，要睇醫生。